Юлашки çулсенче республика территорийĕнче интернет сечĕпе усă курса тунă ултавла ĕçсем нумайлансах пыраççĕ. Кăçалхи январь-июнь уйăхĕсенче Çĕмĕрлере пурăнакансем тĕлĕшпе те ултавла ĕçсем пулнă. Преступленисене ытларах чухне тĕрлĕ сайтсем урлă тавар туяннă е сутнă пек тунă, çавăн пекех вируслă программăсемпе те усă курнă.

Асăннă преступленисене çак ушкăнсем çине уйăрма пулать:

1. Интернет-сайт е тỹлевсĕр пĕлтерỹ хаçачĕсем урлă тавар туяннă е сутнă пек туни. Пĕлтерỹсене тĕрлĕ сайтсене вырнаçтараççĕ: "Авито", "Авто.ру", "Домофон"... е тỹлевсĕр хаçатсенче. Ултавçăсем пĕлтерỹре кăтартнă телефон номерĕпе шăнкăравласа хăйĕнпе тавар туянакан пек паллаштараççĕ, "тавар туянма" укçа куçарма сутуçăран банк карттин реквизичĕсене ыйтса пĕлеççĕ, терминал патне пырса тĕрлĕ кнопкăсене пусма ыйтаççĕ. Граждансене тимлĕрех пулма ыйтатпăр, карттăн реквизичĕсене никама та калама юраманнине аса илтеретпĕр. СМС-пĕлтерỹ урлă килекен вăрттăн кодсене те каламалла мар.
2. Таварсене интернет-сайтсенче туянмалли сăлтавпа. Инкек тỹсекен çын хăй суйланă таваршăн укçа куçарать. Таварĕ вара туянакан патне çитмест. Интернет-сайчĕ ĕçлемест, унта кĕме май çук - блокировка ларать. Пур сайта та шанма юрамасть, çавăнпа та пĕлмен сайтсем урлă таваршăн укçа-тенкĕ куçармалла мар.
3. Вируслă программăпа усă курса. Инкек тỹснĕ çыннăн телефонĕ çине СМС-пĕлтерỹ çитет. Унта пĕр-пĕр сăлтавпа ссылкăпа куçма ыйтать. Асăннă СМС-пĕлтерĕве уçсан инкек тỹсекенĕн банк картти çинчен пур-çук укçа çухалать. Палламан номерсенчен килнĕ СМС-пĕлтерỹсене уçма, унта кăтартнă ссылкăсемпе куçма кирлĕ мар. Хăвăр телефонăн, смартфонăн хăрушсăрлăхĕ пирки шухăшлăр, вируса хирĕçле хушăм вырнаçтарăр. Çавăн пекех "Сбербанк онлайн" хушăмра регистрациленĕр.
4.  Ултавçăсем - "банкăн хăрушсăрлăх службин сотрудникĕсем". Вĕсем инкек тỹсекен çыннăн сотовăй телефонĕ çине шăнкăравласа унăн счечĕ çинчен санкцисĕр укçа сăтăрса илнĕ тесе пĕлтереççĕ. Банк счечĕ çине кĕме май ан пултăр тесе карттă номерне тата парольне ыйтаççĕ. Палламан çынсене, вăл шутра "банк хăрушсăрлăх службин сотрудникĕсене" те, карттăн реквизичĕсене, пин-кодсене пĕлтермелле мар. Карттăпа ыйтусем тухсан ăна панă банкран пулăшу ыйтмалла. "Вĕри линийĕн" телефонĕсем карттăн тепĕр енче пур.

Районти полици уйрăмĕ.