"Вилнисем чĕррисемпе пĕр рете тăрсан Раççей вăйлăрах пулать", - çапла каланă иккен пуласлăх çинчен пĕлтерекен Ванга темиçе теçетке çул каялла. Сăмах Раççейре юлашки çулсенче йĕркелесе ирттерекен "Вилĕмсĕр полк" пирки пынă теççĕ.

Чăнах та, кăçал "Вилĕмсĕр полк" çĕршывра 10 миллион ытла, республикăра 70 пине яхăн çынна пухнă. Хĕрлĕчутайсем те асăннă полк йышне тăчĕç, вăрçăра пуç хунисен, Тăван çĕршыва тискер тăшманран хỹтĕленĕ тăванĕсен, çывăх çыннисен сăнỹкерчĕкĕсене çĕклесе утакансен йышĕ пине яхăн та пулчĕ пулĕ. Хĕрлĕ Чутайри Турă Хĕресне Çĕкленĕ храм патĕнчен пуçласа Çĕнтерỹ лапамне çити шкул ачисем, вĕрентекенсем, тĕрлĕ çĕрте ĕçлекенсем, районти ялсенче пурăнакансем, хăнасем утрĕç. Малта - Раççей ялавне тата Çĕнтерỹ ялавĕн копине çĕклесе утакан Хĕрлĕ Чутай шкулĕн çамрăк армеецĕсем, унтан - шествине пухăннисем. "Вилĕмсĕр полк" тата вăрçă вăхăчĕ çинчен юрăсем янăранă май шестви ерипен утрĕ, утнăçемĕн вĕсем патне вăрçăра пулнисен сăнỹкерчĕкĕсене çĕкленĕ çынсем татах хушăнса пычĕç. Вĕсем хушшинче ача садне çỹрекенсене те курма пулчĕ.

Çитес çул эпир Аслă Çĕнтерĕве 75 çул çитнине паллă тăвăпăр. Ун чухне "Вилĕмсĕр полк" йышĕ татах ỹсессе шанас килет - мирлĕ пурнăç парнеленисене асра тытни пире пĕр çĕре чăмăртать, кăмăл-туйăм енчен вăйлăрах тăвать...

А.КАРПОВА.