Раççей Президенчĕн Владимир Путинăн Указĕпе 2019 çула Раççейре Театр çулталăкĕ тесе йышăннă. Çавна май февралĕн 1-мĕшĕнче районта Театр çулталăкне савăнăçлă лару-тăрура официаллă майпа уçрĕç.

Театр çулталăкне уçасси икĕ тапхăрпа иртрĕ теме пулать. Малтанах кăнтăрла Чăваш Республикин Пуçлăхĕ Михаил Игнатьев, иртнĕ çулхи ĕç-хĕле пĕтĕмлетекен анлă канашлăва пуçличчен, районти Культура çуртĕнчи фойере йĕркеленĕ куравпа паллашрĕ. Кунта хамăр патра тата ытти çĕршывра театр мĕнле аталаннине сăнларĕç, районти культура ĕçченĕсем тата шкул ачисем тĕрлĕ сăнарсене калăпларĕç. Хĕрлĕ Чутай шкулĕнче 1 Г класра вĕренекен Алена Фролова, ỹссен артистка пулма ĕмĕтленекенскер, сумлă хăнасене театр пирки калакан сăвва питĕ пултаруллă вуласа пачĕ.

Каçхине вара Культура çурчĕн сцени çине районти театр пултарулăх ушкăнĕсем тухрĕç, тĕрлĕ спектакльсен сыпăкĕсене лартса пачĕç. Чаршав уçăлсан асам пуçланнине Тралькассинчи, Сĕнтĕкçырминчи Культура çурчĕсем çумĕнчи тата районти Культура çурчĕн Çамрăксен театрĕн артисчĕсем çирĕплетсе пачĕç. Вĕсемпе пĕрлех уяв каçне çамрăксем тата куракансем хушшинче тахçанах ырă ята тивĕçнĕ артистсем хăйсен ташши-юррисемпе илем кỹчĕç.

Аса илтеретпĕр, пирĕн районта çулсеренех "Асамлă чаршав" фестиваль иртет, пĕлтĕртенпе ăна республика шайĕнче йĕркелеме пуçларĕç. Кăçал, Театр çулталăкĕ пулнă май, спектакльсем лартас ĕç малалла пурнăçланасса, çĕнĕрен те çĕнĕ талантсем çуталасса шанатпăр.

А.КАРПОВА.