Çĕнĕ çул уявĕ тата хĕллехи каникул пуçланнă май ашшĕ-амăшне тĕпренчĕкĕсем тĕлĕшпе тимлĕрех пулмаллине аса илтерес килет.

Юлашки эрнесенче урамсенче тĕрлĕ пиротехника-петарда сирпĕннине асăрханă пулĕ. Ăна шкул ачисем кăна мар, аслă çулсене çитнисем те шартлаттараççĕ. Вĕсен те ачалăха тавăрас килет-ши? Япаларан çаклансан, вăхăт иртсен сирпĕнсен çав пĕчĕк петардах иртен-каякана, ăна чĕртекене суккăр е пỹрнесĕр хăварма пултарать-çке. Кун пек тĕслĕхсем республикăра çулсеренех тĕл пулаççĕ. Инструкцие пăхăнмасан ĕмĕрлĕхех инвалид юлма пулать.

Хальхи вăхăтра тата ачасене валли тĕрлĕ ярăнмалли хатĕрсем кăларсах тăраççĕ - ватрушки, ледянка... Вĕсемпе ярăннă чух та тимлĕ пулмалла. Аслисен ачисене пăхсах тăмалла. Çырмаран ярăнса аннă чух ăнсăртран пысăк çул çине тухсан машин айне пулма та хăвăрт. Çавăнпа та вĕсемпе ярăнмалли ятарлă вырăн пулмалла, ун çывăхĕнче шыв-шур та, транспорт çỹрекен çул та пулмалла мар. Урăхла каласан, хăвăр пĕлнĕ, тĕрĕсленĕ хăрушсăр вырăнта савăнмалла. Акă нумаях пулмасть Чутайри шкул çывăхĕнче конькипе ярăнмалли площадка ĕçлеме пуçларĕ. Унта та ачасем хаваспах çỹреççĕ. Коньки тĕпĕ çивĕч пулнине асра тытмалла, ачасене çакăн пирки асăрхаттарсах тăмалла.

Вăрăм канмалли кунсенче эрех-сăрапа асăрхануллă пулмалли пирки аса илтересшĕн. Хăвăр сывлăха сиен ан кỹрĕр. Çавăн пекек пĕчĕк ачаллă ашшĕ-амăшне тĕпренчĕкĕсене тивĕçлĕ пăхма сĕнесшĕн. Аслисен тимсĕрлĕхне пула кăкăр ачи пурнăçран уйрăлни те пулман мар-çке районта.

Юлашкинчен пĕтĕмлетсе çакна каласа хăварасшăн. Кăмăла хуçакан самантсем ан пулччăр, пурин те çывхарса килекен уявсем савăнăçлă иртчĕр.

Район больницин администрацийĕ.