Кăçал хăтлăх кỹмелли объектсемшĕн сасăламалли Пĕтĕм Раççейри платформа - za.gorodsreda.ru (https://21.gorodsreda.ru/) - хута кайрĕ. Асăннă сасăлав сайтра апрелĕн 26-мĕшĕнче ĕçлеме тытăнчĕ, вăл майăн 30-мĕшĕччен пырĕ. Унта 2022 çулта хăтлăх кỹме палăртнă объектсемшĕн сасăлама май пулĕ. Сасăлава 14 çулхи çамрăксенчен пуçласа унтан аслăрах çынсенчен кашниех хутшăнма пултарать. Платформа сайчĕн мобильлĕ версине те пăхса хунă, çавăн пекех сасăлав валли уйрăм приложени те тума палăртнă.

Граждансем патне платформа ĕçĕ пирки информаци çитерме волонтерсем пулăшĕç. Вĕсем нумай функциллĕ центрсенче, суту-илỹ центрĕсенче, культура объекчĕсемпе обществăлла вырăнсенче планшетсемпе ĕçлĕç. Эппин, граждансем хăтлăх кỹмелли объектсемшĕн вĕсем урлă та сасăлама пултарĕç. Палăртмалла, районта ку енĕпе пурĕ 16 волонтер ĕçлĕ.

Хăтлăх объекчĕсен сасăлав рейтингĕн списокне Аслă Çĕнтерĕве 50 çул çитнине халалланă Хĕрлĕ Чутай салинчи парка хăтлăх кỹмелли проекта кĕртнĕ. Çитес çул асăннă паркра хăтлăхпа тирпей-илем кỹмелли иккĕмĕш тапхăра пурнăçласшăн. Проектăн тĕп идейи паркра Аслă Çĕнтерĕве тата Сăр хỹтĕлев чиккисене тунă паттăрсене халалланă асăну стелисене вырнаçтарнă тĕп лапам йĕркелессипе çыхăннă. Тĕп вырăнта асăну инсталяцийĕ, тĕрлĕ енчен вара информациллĕ стендсем лартасшăн. Çавăн пекех кану вырăнĕсем тата скандинави уттипе çỹрекенсем валли çул тума пăхса хунă.

Çĕнтерỹ паркĕн сăнĕ илемлентĕр, территори хăтлăрах пултăр тесе активлăрах сасăлар.

Н.МИДАКОВА.