Тĕнчипех çĕнĕ коронавирус инфекцийĕ сарăлчĕ. Шел те, Раççейре те унпа чирлисем çук мар. Акă иртнĕ эрнере аякран килнĕ чăвашăнне те çак вируса тупса палăртрĕç. Мартăн 26-мĕшĕ тĕлне районта ку инфекцие ертнĕ тĕслĕхе регистрацилемен. Райбольницăри районсем хушшинчи инфекци уйрăмĕнче те коронавируспа чирлĕ çынсем выртмаççĕ.

Апла пулин те пирĕн ку чире сарăлма парас мар тесен сыхă пулмалла. Уйрăмах ют çĕршывсенчен таврăнакан, вахта мелĕпе республика тулашĕнчен ĕçлесе килекен граждансене асăрхаттарас килет. Вĕсен çитсенех килĕсенче 14 кун хушши ниçта тухмасăр лармалла. Хăйсене япăх туйма тытăнсан, çивĕч респираторлă вирус инфекцийĕпе пĕр евĕрлĕрех коронавирус симптомĕсем (типĕ ỹслĕк, пыр ыратни, сывлама йывăрри, пысăк ỹт температури, час ывăнни...) палăрма пуçласанах киле тухтăра чĕнмелле. Пĕр-пĕрне хисеплĕр, регион тулашне тухса кайма ан васкăр!

Асăннă вирус инфекцийĕ чирлĕ çынран теприне сывлăш (ỹсĕрнĕ, сунасланă тата калаçнă чухне) тата тусан урлă, хутшăннă май ерме пултарать. Апат продукчĕсемпе йăлари япаласем урлă та куçма пултарать. Çавăнпа та профилактика мерисене çирĕп пăхăнмалла:

пите алăпа тытмалла мар;

алăсене тăтăшах çумалла;

антисептиксемпе усă курмалла;

маскăсемпе çỹремелле;

çынсемпе хутшăнмалла мар;

пĕр-пĕрне алă памалла мар.

Лилия ЗАЙЦЕВА, район больницин врач-инфекционисчĕ.