Акă, паян та асрах. 1984 çулта хĕл сивĕ килчĕ, юрĕ те нумай çуса лартрĕ, çил-тăман алхасрĕ. Мишеркассипе Пĕчĕк Этмен хушшинчи çула 2,5 метр хулăнăш юр тултарса лартрĕ. Машинăсем çулпа мар, уйпа çỹреме пуçларĕç. Пĕр икĕ эрне те пулать пулĕ, çулпа транспорт çỹремерĕ. Февралĕн 20-мĕшĕнче А.Д.Смалайкин Çĕмĕрлене кайса виçĕ бульдозер илсе килсе çула тасаттарчĕ. Ĕçсене февралĕн 26-мĕшĕнче вĕçлерĕç. Эпĕ вăл вăхăтра Пантьăк лесничествине ертсе пыраттăмччĕ. Апрель уйăхĕ çитсен вара "Искра" хуçалăх ертỹçипе Александр Дмитриевич Смалайкинпа çулсем хĕррипе йывăçсем лартма шутларăмăр. Эпир хамăр ĕçлекенсене, вăрманçăсене, шкул ачисене, колхоз ĕçченĕсене илсе тухса 1984-1986 çулсенче çул хĕррисемпе йывăçсем лартса тухрăмăр. Çак илемлĕ, лаштра йывăçсене эпир паянхи кун та куратпăр. Хăшĕ-пĕрне çамрăк хунавсем чухнех выльăх кĕрсе кайса пĕтерчĕ. Вăл вăхăтра выльăх-чĕрлĕх кĕтĕвĕ ытларах çул хĕррипе çỹренĕ.

Кайран район администрацийĕн çутçанталăк комитетне ертсе пыма пуçларăм. Ял администрацийĕсем пулăшнипе чылай ĕç пурнăçларăмăр. Районта пурăнакансем те çутçанталăка пулăшассипе нумай ĕçлерĕç. Ял тăрăхĕсен пуçлăхĕсемпе, шкул директорĕсемпе, ялхуçалăх ертỹçисемпе 1989 çултан пуçласа мĕн 2009 çулччен çыхăну тытса вăй хутăмăр. Нумайăшĕ пирĕнтен уйрăлса кайрĕç. Апла пулин те вĕсем хăйсен ырă ĕçĕсемпе пирĕн асăмра ĕмĕрлĕхех юлчĕç: А.Д.Смалайкин, П.В.Васюков, В.В.Белов, Н.К.Самсонов, И.Н. Никифоров, Н.П.Стафик, Д.Р.Волков тата ыттисем те.

Тĕплĕнрех - «Пирĕн пурнăç» хаçатра.