Мунча Раççейре пурăнакансен чи юратнă кану вырăнĕсенчен пĕри шутланать. Канмалли кунсенче тата уявсенче кашниех мунча хутма тăрăшать. Апла пулин те вăхăта савăнăçлă тата усăллă ирттерни, сывлăха çирĕплетни инкеке çаврăнма пултарать. Статистика кăтартнă тăрăх, шăпах канмалли кунсенче пушарсен шучĕ ỹсет. Сăлтавĕ - мунчана вут илни. Çулталăк пуçланнăранпа округра пĕр мунча çуннине регистрацилерĕмĕр. 2025 çул хушшинче округра çичĕ мунча кĕлленчĕ.

Палăртмалла, мунча - пушар тухас хăрушлăх çăлкуçĕ. Çавăнпа та ăна тунă тата унпа усă курнă чух правилăсене пăхăнмалла. Мунчасенче пушар тухнин тĕп сăлтавĕ - кăмакапа тĕтĕм тухмалли пăрăх тата йывăç япаласем хушшинчи хушă пĕчĕк пулнинче.

Шăпах вĕсене пысăк тимлĕх уйăрмалла:

- Чи малтанах тĕтĕм тухмалли пăрăха тĕрĕслесех тăмалла. Унăн япалисем вырăнтан шусан çурăкран тĕтĕм тухма пултарать. Никĕсне пăхсах тăмалла - вăл çирĕп-и?

- Урай йывăçран е çунакан ытти материалтан пулсан, кăмака алăкĕ патне 50х70 сантиметртан кая мар хурçă листа хумалла.  

- Заводра туса кăларнă тимĕр кăмакасене вырнаçтариччен темиçе рет кирпĕч хурса тухмалла е никĕс ямалла. Кăмакапа йывăç урай хушшинче хăрушсăр хушă пулмалла.

Пăрăх çỹллĕшне тĕрĕс вырнаçтармасан тата ытти çитменлĕхсем пулсан, пушар тухас хăрушлăх ỹсет. Çавăнпа та специалистран пулăшу ыйтмалла.

Тĕплĕнрех - «Пирĕн пурнăç» хаçатра.