Юр çăвать те çăвать, хушăран шартлама сивĕпе те "савăнтарать" çанталăк. Февраль уйăхне 30 градус ытла сивĕпе кĕтĕмĕр. Эрне вĕçнелле çанталăк кăмăлĕ кăштах "çемçелчĕ": сивĕ вырăнне каллех юрлă кунсем пуçланчĕç...

Хĕл кунĕсем юртан пуян пулнине юлашки çулсенче манса та кая пуçларăмăр. Резина атăпа хĕл каçнисем те, уй-хирте армутине юр витсе лартман хĕл кунĕсем те пулчĕç. Майĕпен хăнăхрăмăр та пулас кун пек йĕркене. Иртнĕ декабрь уйăхĕнче çеç хĕл лармасть пулĕ тесе юр çуманнишĕн кулянса пурăнтăмăр. Çĕнĕ çул хыççăн нихçанхинчен ытларах юр çуса лартни пире вара кулленхи йĕркерен кăларса та ячĕ пулас. Сăнанă тăрăх, кăçалхи пек юрпа пуян хĕл 1958 çулта пулнă. Кĕртсен çỹллĕшне илес пулсан çулталăкăн пĕрремĕш уйăхĕ 21-мĕш ĕмĕрти лидер пулса тăнă. Январĕн 31-мĕшĕ тĕлне юр сийĕ 65 сантиметра çитнĕ пулсан, февральте 80 сантиметртан та иртнĕ. Çакăнпа кăна лăпланса ларасси паллă та мар-ха. Синоптиксем пĕлтернĕ тăрăх, çитес вăхăтра та юр çумалла.

Юр нумай çуни пур тытăмри ĕç-хĕле те тĕрĕслерĕ темелле. Автомобиль çулĕсене юр хỹсе лартрĕ, урамсене кĕрсе тухма тата çуртсем патне сукмак çулĕ те пулмарĕ. Лару-тăрăва куçран вĕçертмерĕ, вĕçертмест те округ администрацийĕ.

Тĕплĕнрех - "Пирĕн пурнăç" хаçатра.