Тĕмсен, çамрăк йывăçсен турачĕсем ан хуçăлччăр тесен вĕсене юртан тасатмалла. Тĕрĕссипе, вĕсене кĕркуннех варрине патак лартса е унсăрах çыхса хăвармалла. Çак ĕçе тума ĕлкĕреймен пулсан асăрханса (шăпăрпа е патакпа) тасатмалла, силлемелле. Унсăрăн çуркунне йывăрланнă юр кăнтăрла ирĕлет, каçхине шăнать, турат çумне хытать, каллех ирĕлсе турата хуçать. Хăш-пĕр чухне пăрлă çумăр çăвать. Ку сад-пахчашăн хăрушлăх кăларса тăратать. Çавăнпа патак е шалча çине татăк çыхса туратсене унпа шаккамалла.

Пахчара кĕрт самаях лартать-ха, хăш-пĕр вырăнта вара çĕр çарах тăрса юлать. Çавăнпа уйрăмах çĕр çырли йăранне юрпа витмелле. Кил-çурт çывăхне илем кỹме лăсăллă йывăç (туя, чăрăш, хыр...) лартнă-тăк, вĕсен тăррине хупламалла. Февраль уйăхĕн вĕçĕнчех кăнтăрла ăшăтма, каçсерен сивĕтме пуçлать. Температура улшăннă май йывăç вулли сиенленет. Çуркунне пушшех те. Кĕркунне улмуççисен вуллине шуратма ĕлкĕреймен пулсан халĕ вĕсене лутрасилпа чĕркемелле. Унсăрăн температура улшăнма тытăнсан йывăç вулли çурăлать. Абрикоспа персик йывăçĕсене те çаплах тумалла. Теплица тăррине юр çуса тултарсан, вăл авăнать, юрăхсăра тухать. Çавăнпа малтан теплицăна шал енчен тимĕр икĕ брус тăратса тĕреклетмелле. Ун хыççăн шала юр тултармалла. Çуркунне валли питĕ лайăх нỹрĕк пулать.

Тĕплĕнрех - "Пирĕн пурнăç" хаçатра.