Нумаях пулмасть Карăкçырминчи Максимовсен тăван килĕнче Илья Иванович çуралнăранпа 100 çул çитнине халалласа асаилỹ каçĕ иртрĕ. Çавра сĕтел хушшине ачисем, мăнукĕсем, кĕçĕн мăнукĕсем, ял çыннисем пухăнчĕç, кивĕ сăнỹкерчĕксене пăхнă май Илья Максимова аса илчĕç.

Вăл 1926 çулхи январĕн 31-мĕшĕнче Карăкçырминчи Анна Ивановнăпа Иван Сергеевич Максимовсен çемйинче çуралнă. Арçын ача тăватă çул тултарсан унăн ашшĕне совет влаçĕн тăшманĕсем вĕлернĕ. Вăхăт иртсен амăшĕ Василий Петрович Наштыковпа çемье çавăрнă. Илья Иванович Пантьăкра пурăнакан кукамăшĕ патне çара уран уй-хир урлă чупнине пĕрре мар аса илнĕ. Тен, ăна чун ăшшипе тимлĕх çитеймен. Çапла, ачалăхĕ те иртсе кайнă. Арçын ача Хирлỹкассинчи çичĕ класс вĕренмелли шкула пĕтернĕ, ытти çамрăксем пекех колхозра ĕçленĕ. 1943 çулхи декабрьте Хĕрлĕ çар ретне тăнă. Чăваш Енри салтаксене ятарлă çыхăнупа тивĕçтерме хатĕрленĕ. Связистсемпе телефонистсем тăван чĕлхепе çыхăну тытнă, фашистсем информацие ăнланма ан пултарччăр тенĕ. Илья Иванович Белорусси фронтĕнче çапăçнă, Белоруссие, Польшăна ирĕке кăларнă, Кенигсберг хулине илнĕ çĕре хутшăннă. Унтан вĕсене яппун милитарисчĕсемпе çапăçма Инçет Хĕвелтухăçа янă. Çĕнтерỹ кунне çул çинче кĕтсе илнĕ. Çамрăк салтаксене тивĕçлĕ вăхăтлăх службăра хăварнă. Вĕсем Тăван çĕршыв чиккисене хỹтĕленĕ.

Тĕплĕнрех - "Пирĕн пурнăç" хаçатра.