Чăваш Республикин Пуçлăхĕ Олег Николаев ĕнер, февраль уйăхĕн 5-мĕшĕнче, пысăк пресс-конференци ирттерчĕ. Вăл 2 сехет те 30 минута яхăн пычĕ. Регион Пуçлăхĕ республикăшăн пĕлтерĕшлĕ ыйтусене хускатрĕ, журналистсене тата медиацентрсемпе çамрăксен юхăмĕсен представителĕсене хумхантаракан 30 яхăн ыйтăва хуравларĕ.

Пресс-конференцире туризмпа ҫыхӑннӑ ыйтусем чылай пулчӗҫ. Регион ку енӗпе пысӑк утӑмсемпе малалла аталанать. Вӑл шутра юханшыв туризмӗ те, хӑнасене пӗчӗк хуласене илӗртесси те. Пысӑк проектсен йышӗнче - Сӗнтӗрвӑррипе Куславккара причалсем тӑвасси. Шуршӑлти Космонавтика музейӗ те паянхи саманапа килӗшӳллӗн ҫӗнелет.

«Раҫҫей симӗс ылтӑнӗ», Ҫырла фестивалӗсем, ытти калӑпӑшлӑ уяв пынӑ хушӑра хӑна ҫурчӗсем тулли. Ҫавна май номерсен фондне анлӑлатассипе те малалла ӗҫлеҫҫӗ.

Республикăра ӑшӑ сечĕсем кивелсе çитни, вĕсене пĕчĕккĕн çĕнетсе пыни пирки те калаҫнӑ пресс-конференцире. Паян Куславккара, Çĕмĕрлере ăшăпа тивĕçтерессине йĕркеленĕ. Улатăрта та ку ĕçе туса çитермелле. Ку енĕпе пирĕн округа та пресс-конференцире лайӑхпа асӑннӑ тата чылай ӗҫ туни пирки палӑртнӑ.

Тĕплĕнрех - хаçатăн çитес кăларăмĕсенче.