Çулсем иртнĕçемĕн тăтăшах асаилỹсенче ачалăха таврăнатăп. Чăннипех телейлĕ пулнă çав вăхăт тесе калас килет.

Ун чухне, хальхилле каласан, "гаджетсенчен" пирĕн радиопа телевизорсăр пуçне ним те пулман. Ача-пăча вĕренỹрен, килти ĕçрен пушă саманта ытларах урамра ирттернĕ. Çулла таврари пĕве-кỹлĕре чăмпăлтатса савăннă, пулă тытнă, вăйăсем вылянă, карçинкка йăтса çырла-кăмпана чупнă. Хĕлле вара тăвайкки, пăр çийĕ хăйсем патне туртнă-илĕртнĕ. Юханшыв çыранĕсенче, сăртлă вырăнсенче, паянхи пек, юр кăпăшланса выртайман, наччасрах шăпăрлансем тап-такăр туса хунă ăна. Кам йĕлтĕр сырса тухнă, кам çунапа ярăннă. Пăрлантарнă ларкăчпа, утă-улăм тултарнă полиэтилен михĕсем çине ларса тăвайккинчен çил пек вĕçсе аннисем те асран тухмаççĕ. Пит çăмартисем анис улма пек хĕрелетчĕç. Нимле сивĕ çанталăк та хăратаймастчĕ пире, сывлăш температури анса ларнипе шкула каймасан та, ярăнма тухман пĕр кун та юлман пуль хĕлле. Кашни çемьерех йышлă ача ỹснĕрен урам вĕсен сассипе кĕрлесе кăна тăнă. Каçхине тĕттĕмленсе лармасăр, аннесем тухса чĕнмесĕр те уйрăлас килместчĕ хаваслă ушкăнран. Сивĕпе, юр çыпçăннипе алсишсем, тумтирпе çăматăсем пăрланса шăкăртатакан пулса ларатчĕç. Темле йĕпенсе таврăнсан та атте-анне хытах ятлаçмастчĕ, уçă сывлăшра пулни ачисен сывлăхĕшĕн усăллине ăнланнах вĕсем.

Тĕплĕнрех - "Пирĕн пурнăç" хаçатра.