Кăçал çак çулта çуралнисен диспансеризаци витĕр тухмалла: 1987, 1990, 1993, 1996, 1999, 2002, 2005, 2008. Çавăн пекех - 40 çул тултарнисен тата аслăраххисен, вĕсем валли тĕрĕслев çулсерен иртет.

Диспансеризаци витĕр тухас текенсен чи малтанах медицина профилактикин кабинетне, участокри врач тата пĕтĕмĕшле практика врачĕ патне каймалла. Çумра паспорт, СНИЛС, ОМС полисĕ тата амбулатори картти пулмалла.

Диспансеризацин пĕрремĕш тапхăрĕнче, ỹсĕмне кура, тĕрлĕ тĕрĕслевсем ирттереççĕ. Чи малтанах çыннăн анкетировани витĕр тухмалла. Унтан унăн йывăрăшне, тăршшĕне виçеççĕ, кĕлетке массин индексне палăртаççĕ. Юнри глюкоза тата холестерин шайне те тĕрĕслеççĕ. Пациентăн флюорографи, ЭКГ тумалла пулать. Хĕрарăмсен, паллах, гинеколог патĕнче тĕрĕсленмелле, 40 çул тултарсан вара маммографи тутармалла. Маммографи тĕрĕслевне район больницинчех тухма пулать. Çакна валли маммограф пур. Çавăн пекех райбольницăра вар-хырăма ятарлă аппаратпа тĕрĕслеттерме май пур.

Тĕрĕслевсем витĕр тухнă хыççăн пациентăн врач-терапевт патне каймалла. Вăл анализсене кура диагноз лартать, кирлĕ пулсан хушма тĕрĕлеве ярать.

Хушма тĕрĕслевсене диспансеризацин иккĕмĕш тапхăрĕнче ирттереççĕ. Ун кăтартăвĕпе терапевт тепĕр хут консультаци ирттерет, диагноз лартса сиплев курсне палăртать.