Хватукасси ялĕнче пурăнакан Вера Ивановна Журавлева декабрĕн 16-мĕшĕнче хăйĕн 90 çулхи юбилейне кĕтсе илнĕ, çывăх çыннисенчен тата хăнасенчен салам сăмахĕсем йышăннă.

Вера Ивановна Пантьăк салинче çуралса ỹснĕ. Çемьере виçĕ ача пулнă. Ашшĕ Аслă Отечественнăй вăрçă пуçлансанах тăшмана хирĕç тăнă, хыпарсăр çухалнă. Амăшĕн виçĕ ачине пĕчченех ура çине тăратма тивнĕ. Вера асли пулнă, çавăнпа кил хуçалăхĕнчи ĕç ун çине тиеннĕ. "Анне пире мĕнпур йывăрлăха çĕнтерсе çĕршыва юрăхлă çынсем турĕ", - куççульпе аса илет иртнĕ йывăр вăхăта кинемей. 1954 çулта вăл хăйĕн шăпине Хватукассинчи Александр Дмитриевичпа çыхăнтарнă, сакăр ача - пилĕк хĕрпе виçĕ ывăл - амăшĕ пулса тăнă. Вăл та ĕмĕрĕпех колхозра механизаторта, комбайнерта вăй хунă. Шел те, мăшăрĕ виçĕ теçеткене яхăн çул каялла пурнăçран уйрăлнă. Апла пулин те хĕрарăм пуçне усман, ачисемшĕн, мăнукĕсемшĕн тăрăшнă.

Вера Ивановна тăван "Искра" колхозра ĕçленĕ, пăрусене пăхнă: нимĕнле йывăр ĕçрен те хăраса тăман, тỹрĕ кăмăлпа вăй хунă, шаннă ĕçе тивĕçлĕ пурнăçланă. Ĕçри кăтартусемшĕн чылай Хисеп хучĕпе Тав çырăвне тивĕçнĕ. Вăл яланах ял çыннисемшĕн, ĕçтешĕсемшĕн ырă тĕслĕх пулнă.

Тĕплĕнрех - "Пирĕн пурнăç" хаçатра.