Юлашки çулсенче ял сăн-сăпатне пушă çуртсем илемсĕрлетни пирки час-часах калаçнине илтме пулать. Шел те, вĕсем чылай ялта йышлансах пыраççĕ. Хăшĕ-пĕрисен хуçисем тахçанах пурнăçран уйрăлнă ĕнтĕ. Теприсем, хулара е урăх вырăнта тĕпленнĕ май, хăйсем ỹссе çитĕннĕ, ашшĕ-амăшĕ хăй вăхăтĕнче ырă пуласлăха шанса çĕкленĕ килне яла кайса пăхса тăма васкамаççĕ. Кун пек тĕслĕх те кашни ялтах пур.

Ял илемне янисĕр пуçне пушă çуртсем таврара пурăнакансем валли хăрушлăх кăларса тăратаççĕ. Лараççĕ те лараççĕ вĕсем юхăнса, никама та чăрмантармаççĕ тейĕ хăшĕ-пĕри. Çук çав, шикленмелли пурах. Пĕр-пĕр çăмăлттай шухăшлă е ỹсĕр çын иртсе кайнă чух сỹнтермен пирус тĕпне пăрахса хăварсан, пушар тухасси те инçех мар. Типĕ çулçăпа тĕрлĕ çỹп-çапа пуçтарса, курăка çулса тăмасан, сарăлса каякан йывăç-тĕме касмасан çулталăк хушшинчех кил-çурт территорийĕ юхăнса каять. Темиçе çул кил хуçи ура ярса пусмасан - пушшех те. Йĕри-тавра ăпăр-тапăр, типĕ çулçă-курăк выртсан вара вут-çулăм хăвăрт çавăрса илеет, кỹршĕсене те сиен кỹресрен питĕ хăрамалла. Кун пек тĕслĕх октябрь вĕçĕнче Туктамăш ялĕнче те пулчĕ. Темиçе çул никам та пурăнман йывăç кивĕ çурт темле сăлтавпа кĕске вăхăтра çунса кĕлленчĕ. Юрать, çывăхри çуртсенче пурăнакансем инкек тỹсмерĕç.

Тĕплĕнрех - "Пирĕн пурнăç" хаçатра.