Округри "Санккино" предприяти ноябрĕн 26-29-мĕшĕсенче Уфара иртнĕ IX Халăхсем хушшинчи "Пирĕн бренд" фестивальте дегустаци конкурсĕнче пĕрремĕш вырăна тата ылтăн медале тивĕç пулнă.

Фестивале Раççейĕн 11 регионĕнчи тата чикĕ леш енчи çĕршывсенчи предприятисем хутшăннă. Вăл ятарлă "ПродТехЭкспо" проектсем валли площадка пулса тăнă. Вĕсене пĕрремĕш хут сыр фестивалĕ, ĕçмесен фестивалĕ, пылак пасар, кайăк-кĕшĕкĕн элитлă ăрачĕсен аукционĕллĕ хур фестивалĕ кĕнĕ.

"Санккино" сыр завочĕ 2022 çултанпа чăн-чăн тăварланă сырсем туса кăларать. Паянхи кун завод продукцийĕ хăйне евĕрлĕхне тата пахалăхне пула Раççейĕн 30 ытла регионне ăсатăнать. Пур продуктсене те чăн-чăн чĕр тавартан кăна тăваççĕ, консервантсем хушмаççĕ. "Санккино" сырĕсен ассортименчĕ пысăк пахалăхлă 15 ытла тĕтĕмленĕ тата сĕт продукчĕсенчен тăрать: "Коса", "Балыковый", "Паутинка", "Спагетти", "Бочонок" сырсем...

Предприятие уçнă Светлана Михопарова палăртнă тăрăх, фермер хуçалăхне аталантарма 2021 çулта Россельхозбанкăн "Фермер шкулĕ" проектне хутшăнни пулăшнă. Илнĕ пĕлĕве пула бизнеса аталантармалли тĕрĕс стратеги хатĕрленĕ. Чăваш Ен Правительстви пулăшни, "Перспектива" гранта илни, производство мăнаçлăхне анлăлатма тата ỹстерме май панă. 2021 çулта производствăн пĕрремĕш партийĕ 200 килогрампа танлашнă, 2024 çулта ун калăпăшĕ 236 тоннăна çитнĕ. Хальхи вăхăтра предприяти кунсерен 20 тонна таран сĕтпе ĕçлет, уйăхне 60 ытла тонна продукци ăсатать.

Тĕплĕнрех – «Пирĕн пурнăç» хаçатра.