Халĕ вăрлăха стратификацилесси çинчен нумай калаççĕ. Мĕне пĕлтерет-ха вăл?

Россельхозцентрăн Чăваш Енри управленийĕн специалисчĕсем хуравлаççĕ:

- Вăрлăха стратификацилени - искусствăлла мелпе хĕллехи пек условисем туса пани. Çак тĕллевпе вăрлăха сивĕре тата йĕпе вырăнта тытаççĕ. Стратификациленин тĕп тĕллевĕ - ăна лăпкăлăхран кăларасси, шăтарма пулăшасси. Мĕн тума кирлĕ-ха ку? Нумай ỹсен-тăранăн вăррин хуппи çирĕп. Вăл вĕсене вăхăтсăр шăтса тухасран упрать. Сивĕ тата нỹрĕк çав хуппа çемçетсе биохими процесĕсене пуçараççĕ, вăрлăха ỹсме пуçлама пулăшаççĕ. Вăрлăха стратификацилемесен нумайăшĕ лайăх условисенче те шăтмасан та е хунав ямасан та пултарать. Мĕнле стратификацилемелле-ха? Ăна малтан шывра йĕпетмелле. Кайран хăйăрпа е мăкпа хутăштармалла. Çак хутăша контейнера ямалла та холодильника е нỹхрепе лартмалла. Вăрлăха тĕрĕслесех тăмалла: вăхăт-вăхăтран пăтратмалла, йĕпетмелле. Унăн типсе е çĕрсе каймалла мар. Хăш-пĕр вăрлăха хушăран ăшăра, кайран сивĕре тытмалла. Алычан, чиен, грушăн, улмуççин, абрикосăн, вĕренен, аквилегин, анемонăн, дельфиниумăн, примулăн, флоксăн, хостăн, сельдерейĕн, петрушкăн, кишĕрĕн вăррине стратификацилемелле.