Тăван ялăм маншăн питĕ хаклă. Вăл мана хăйĕн патне яланах туртать. Паян ялта çуртсенчен çурри ытла пушанса юлнă.

Яла каврăç çулçăллă (ясенелистный) вĕрене çавăрса илнĕ. Унăн лаптăкĕ 0,5 гектара çитет. Вăл ялăн Тĕп урамĕпе, лавкка патĕнче, В.И.Паркин хуçалăхĕн тăкăрлăкĕ çывăхĕнче сарăлнă.

Мăн Этмен территори пайĕн начальникĕ Олег Николаев темиçе çул каяллах асăннă йывăçа пĕтересси пирки каланăччĕ. Кăçал тинех, октябрĕн пуçламăшĕнчен пуçласа çак уйăхăн çурриччен, Олег Александрович ертсе пынипе çак йывăçпа кĕрешме тухрăмăр, лавкка çывăхĕнчи лаптăка тата тăкăрлăк патне каякан çула унран тасатрăмăр. Яланхи пекех ялта старостăсăр - Велистрат Велистратович Михайловсăр - пĕр ĕç те пулса иртмест. Вăл тăрăшнипе ĕçе ялта пурăнакан 10 çын пикенчĕ. Территорие тирпей-илем кĕртес ĕçе çак çынсем яланах хутшăннине палăртмалла: М.Г.Ульянов, Н.Г.Ульянов, А.Ф.Сорокин, А.П.Васяткин тата ыттисем те.

Çитес çул, çĕнĕ хунавсем тухсан, В.В.Михайлов тасатнă лаптăксем çинче гербицидсемпе усă курас тĕллевлĕ. Вăл çăткăн йывăçа тĕп тума пулăшмалла. Ялта пурăнакансем те уççăн сывласа ярĕç.

Николай ИЛЬИН, пенсионер