Ялхуçалăх ĕçченĕсен, тирпейлекен промышленноçра вăй хуракансен професси уявĕнче пухăннисемпе хăнасем ял ĕçченĕсем ỹстерсе илнĕ пахча çимĕç тата округри предприятисем туса кăларакан продукци куравĕпе паллашрĕç, тутанса курчĕç. Курав, чăн та, пуян пулчĕ.

Территори пайĕсен администрацийĕсен ĕçченĕсем, вĕренỹ учрежденийĕсенче тăрăшакансемпе ачасем тата алĕç ăстисем хатĕрленĕ куравра мĕн кăна çук-ши? Пахча çимĕçпе улма-çырла, çăкăр-кукăль, сырсен тĕрлĕ тĕсĕсем, чăваш сăри, пылĕ, алă ĕçĕсем...

Курава çулсерен «Хĕвел», «Пилеш» ача сачĕсем (хальхинче вĕсем агрокласра иртнĕ урокпа паллаштарчĕç, ачасем хаваспах ялхуçалăх культурисем çинчен каласа пачĕç, вăрлăх категорийĕсене уйăрма вĕрентрĕç) хутшăнни савăнтарать. «Пучах» ача сачĕ те куравран юлмасть. Хĕрлĕ Чутай тата Мишеркасси шкулĕсем те хăйсен ăсталăхĕпе ыттисене çулсерен паллаштараççĕ.

Çавăн пекех кунта «Красночетайское», «Янтарь» ТЯО-сем хăйсен продукцине тăратрĕç. Чутай çăкăрне, хурăн сĕткенне пĕлмен çын çук та. «Красночетайский мед» ялхуçалăх кооперативĕ те пылĕпе тĕлĕнтерчĕ. «Эпир пурнăçа пылаклăрах тăватпăр», - тет унăн ертỹçи Светлана Ильина. Светлана Михопарова уйрăм предприниматель сыр тăвассипе тимлет, унăн продукцийĕ çĕршывĕпех сарăлать. Кунтах фермерсем туса илекен çĕрулми сорчĕсемпе паллашма май килчĕ. Курса тĕлĕнмелли чылай пулчĕ.

Конкурс пĕтĕмлетĕвĕпе шкулчченхи учрежденисем хушшинче «Хĕвел» ача сачĕ çĕнтерчĕ. Шкулсем хушшинче мишеркассисем малта пулчĕç. Культура учрежденийĕсемпе территори пайĕсем хушшинче Тралькасси территори пайĕ палăрчĕ.

Анна ВАСЮКОВА