Октябрĕн 14-мĕшĕнче округри тĕллевлĕ тата малашлăхлă хĕрарăмсемпе "Уçă калаçу" тĕлпулу иртрĕ.

Унта опытлă предпринимательсем тата хăй тĕллĕн ĕçлекен хĕрарăмсем хутшăнчĕç. Вĕсем тĕрлĕ сферăра тăрăшаççĕ. Акă, Лариса Оринова сад тата пахча таварĕсене сутассипе, вăрлăх енĕпе ĕçлет. Унăн таварĕсем республика тулашĕнче те саланаççĕ. Татьяна Ивантаева строительство материалĕсене сутать. Алиса Морозова уйрăм предприниматель хĕр-пикесене, хĕрарăмсене илем кỹрессипе тимлет. Татьяна Степанова бухгалтер ĕçĕпе отчет тума пулăшать. Татьяна Устинова сыр тăвассипе ĕçлет. Пĕрремĕш утăмсем тăвать пулин те, вăл ялта пурăннипе кăмăллă, хăйĕн ĕçне малалла аталантарас тĕллевлĕ. Светлана Ильинапа Людмила Данилова хурт-хăмăр ĕрчетессипе тимлеççĕ, вĕсен сиплĕ пылĕ çĕршывĕпех сутăнать. Валентина Кузнецова хресченпе фермер хуçалăхне тытать. Марина Рябченко ачасене акăлчан чĕлхине вĕрентессипе ĕçлет. Ун урокĕсене округра пурăнакансем кăмăлпах çỹреççĕ. Унсăр пуçне вăл çĕршыври хуласенче пурăнакан ачасемпе те онлайн уроксем ирттерет. Светлана Алякина вара çĕвĕç ĕçне парăннă.

Тĕплĕнрех - "Пирĕн пурнăç" хаçатра.