Чăваш Республикин Министрсен Кабинечĕ нумай ачаллă çемьесене тата ятарлă çар операцине хутшăнакансен ачисене пулăшмалли йĕркене çирĕплетнĕ. Нумай ачаллă çемьесенчи тỹлевлĕ вĕренекен ачисемшĕн суммăн 50 проценте компенсацилеме палăртнă. Проектпа килĕшỹллĕн компенсаци илме заявлени тăратмалли вăхăт улшăнĕ. Малтан ашшĕ-амăшĕн пулăшу илес тесен вĕренỹ çур çулĕ (семестр е вĕренỹ çулĕ) вĕçлениччен тăхтамалла пулнă. Халĕ заявкăна кирлĕ тапхăр вĕçлениччен тăратма пулать - 2027 çулхи ноябрĕн 30-мĕшĕччен. Çапла майпа çемьесем финанс пулăшăвне вĕренỹ çулĕ пĕтмесĕрех илĕç. Çак ĕç "Çемье" наци проекчĕпе пурнăçланать.

Çавăн пекех ятарлă çар операцине хутшăнакансен ачисене, техникумсемпе колледжсен студенчĕсене, уйăхсерен регион Пуçлăхĕн стипендине тỹлĕç. Вăл 2500 тенкĕпе танлашĕ. Асăннă тỹлеве илес тесен студентăн е унăн саккунлă представителĕн хăй вĕреннĕ организацие заявлени çырмалла тата кирлĕ документсем тăратмалла: паспорт копине, ятарлă çар операцине хутшăнаканăн тăванлăхне çирĕплетекен документсене, банк счечен реквизичĕсене.

Стипендие студент 23 çул тултариччен илсе тăма пултарать. Академи отпускĕ вăхăтĕнче е ачапа ларнă хушăра стипенди тỹлемеççĕ.

Аса илтеретпĕр, республикăра кун пек тỹлеве ятарлă çар операцине хутшăнакансен шкулта вĕренекен ачисем илеççĕ.

Чăваш Ен Правительстви çамрăксене пур енлĕ пулăшма тăрăшать. Ятарлă çар операцине хутшăнакансен ачисене стипенди пани пĕлỹ илмелли хушма сăлтав пулĕ.