Октябрĕн 1-мĕшĕнчен кĕрхи призыв пуçланчĕ. Вăл декабрĕн 31-мĕшĕччен пырĕ. Хальхинче çĕнĕлĕхсем пулĕç.

Малашне призыв пирки тунă йышăну çулталăк тăршшĕпех вăйра пулĕ. Тепĕр майлă каласан, хальхи призывпа каяйманнисене тепри пуçлансан яма пултарĕç. Çавăн пекех кĕрхи призывра Çар учечĕн пĕрлехи реестрĕпе усă курĕç. Унта Раççейри çар учетне илме тивĕç мĕнпур çыннăн даннăйĕсем упранаççĕ. Повесткăсем «Патшалăх пулăшăвĕсем» портал урлă е реестрповесток.рф ятарлă ресурс урлă килме пултараççĕ. Хутлă повесткăсене те пăрахăçламан - вĕсем те килеççĕ.

Аса илтерер: салтака 18-30 çулсенчи çамрăксене илеççĕ. Вĕсен сывлăхĕн «А» е «Б» категори пулмалла. Служба пĕр çула тăсăлать. Унчченхи пекех призывниксене Раççейри çĕнĕ регионсенче (Херсон, Запорожье облаçĕсенче, Донецк Халăх тата Луганск Халăх республикисенче) çар тивĕçне пурнăçлаттармĕç. Повестка парсан пулас салтакăн Раççейрен кайма юрамасть, 20 кун иртиччен çар комиссариатне пымалла, унсăрăн ăна тарса çỹрекенсен йышне кĕртеççĕ.