Республика Пуçлăхĕ Олег Николаев хăйĕн телеграм-каналне республикăра "Пурнăç инфратытăмĕ" наци проекчĕпе килĕшỹллĕн хăтлăлатнă вырăнсен илĕртỹллĕ сăнỹкерчĕкĕсене вырнаçтарнă. Чăнах - пăхса ытармалла мар сăнсем.

Чăваш Ен аталанса илемленет - хуласемпе ялсем хăтлăланаççĕ, хитреленсе çынсемшĕн пурăнма лайăхрах пулаççĕ. Кăçал асăннă нацпроектпа килĕшỹллĕн 33 общество вырăнĕ сăнне улăштарса чиперленмелле. Чылайăшĕнче ĕçсем вĕçленнĕ ĕнтĕ - вĕсем палламалла мар улшăннă, ял-хула çыннисен юратнă вырăнĕсем пулса тăнă.

Палăртма кăмăллă, пилĕк округри сăнỹкерчĕксем хушшинче пирĕн округа асăнни тата Хĕрлĕ Чутай чиркĕвĕн сăнỹкерчĕкне вырнаçтарни питĕ савăнтарать. Çавăн пекех Чăваш Ен Пуçлăхĕ Олег Николаев хăйĕн телеграм-каналĕнче çапларах палăртнă: "Хĕрлĕ Чутайра пĕве таврашне хăтлăлатас ĕçсем малалла пыраççĕ. Кĕпере юсанă ĕнтĕ, пирса малалла тăсаççĕ, Ермей Рожанский бюстне вырнаçтарса уçă тỹпе айĕнче музей уçаççĕ..."

33 объектран 26-шне республикăра пурăнакансем Пĕтĕм Раççейри сасăлава хутшăнса суйласа илнĕ, 5-шĕ перекетленĕ укçапа пурнăçланать, 2-шĕ - Пĕтĕм Раççейри хăтлă хула хутлăхĕн чи лайăх проекчĕсен конкурсĕн кăтартăвĕсем тăрăх.

- Ултă çулта эпир 240 ытла территорие хăтлăлатрăмăр. Пĕтĕмпех - халăхăн хастар позицине пула. Пурăнас, ĕçлес, ачасене çитĕн-терес килекен хутлăха пĕрле йĕркелĕпĕр, - тенĕ Олег Николаев.