Августăн 29-мĕшĕнче Етĕрнере Чăваш Республикинчи фермерсен VI слечĕ иртнĕ. Унта ялхуçалăхĕнчи 250 ытла представитель хутшăннă. Вĕсен йышĕнче пирĕн округ делегацийĕ те пулнă.

Слетра ЧР Министрсен Кабинечĕн Председателĕ Сергей Артамонов пĕчĕк тата вăтам предпринимательсемпе тĕл пулнă - АПК-на аталантарассипе çыхăннă ыйтусене сỹтсе явнă, кăçалхи çур çулхи кăтартусемпе паллаштарнă. Ялхуçалăх производствин индексĕ мĕнпур йышши хуçалăхсенче 106,4 процентпа танлашнă (ку енĕпе Чăваш Ен Атăлçи федераци округĕнче 14 регион хушшинче 2-мĕш вырăн йышăннă), çав шутра ялхуçалăх организацийĕсенче - 111,2 процент. Çулталăк каяллахипе танлаштарсан аш производстви 6 процент, сĕт - 3,2 процент, çăмарта - 35,5 процент ỹснĕ. Çĕре пусă çаврăнăшне кĕртсе пĕтерес ыйтăва та сỹтсе явнă. Малашне ялхуçалăх организацийĕсемпе фермерсене субсиди панă чухне ĕç тухăçлăхĕ çине пăхаççĕ. Кунта ялхуçалăх пĕлтерĕшлĕ мĕнпур çĕре саккунпа килĕшỹллĕн шута илни те кирлĕ. Çавăн пекех пулăшăва культурăсен тухăçĕ республикăн вăтам тухăçĕн кăтартăвĕпе тан е унран 10 процент пĕчĕкрех пулсан тивĕçĕç.

Кăçал аграрисене - 109, çав шутра федерацирен - 58, республикăран 51 программăпа патшалăх пулăшăвĕ параççĕ. Вĕсемпе куçаракан укçан 67 проценчĕ республика бюджетĕнчен килет.

Слетра 2024 çулхи кăтартусем тăрăх "Чи лайăх 100 фермер хуçалăхĕ" рейтинг пĕтĕмлетĕвĕсемпе паллаштарнă. Пирĕн округри фермерсенчен: 52-мĕш вырăнта - Н.Г.Ежеев, 60-мĕшĕнче - Ю.С.Лаптев, 84-мĕшĕнче - П.В.Устинов, 100-мĕш вырăна Л.В.Данилова йышăннă.