2025 çул пуçланнăранпа Раççей Социаллă фончĕн Чăваш Енри уйрăмĕ сусăр ачасен ашшĕ-амăшне 9 пин ытла хушма кану кунĕшĕн тỹленĕ.

Ĕçлекен ашшĕсемпе амăшĕсем, çавăн пекех опекунсемпе попечительсем, сусăр ачасене пăхса çитĕнтерекенсем, уйăхне хушма тỹлевлĕ 4 кану кунне тивĕçеççĕ. Çулталăк пуçланнăранпа Раççей Социаллă фончĕн Чăваш Енри уйрăмĕ çак тĕллеве пурнăçлама 51,5 млн тенкĕ ытла куçарнă.

Ашшĕ-амăшĕ сусăр ачисемпе юнашар ытларах пулччăр тесе хушма кану кунĕсем параççĕ. Вĕсене кашни уйăхрах е 24 кун таран тăсăлма пултаракан отпуск евĕр те, çулталăкра пурĕ 48 хушма кану кунĕ илме пулать. Тỹлеве ашшĕ-амăшĕн вăтам ĕç укçи чухлĕ тỹлеççĕ. Заявление ĕç вырăнĕнчи кадрсен пайне памалла. Тỹлевлĕ кунсемшĕн ĕç паракан хăйĕн укçинчен тỹлет, çак суммăна Раççей Социаллă фончĕн Чăваш Енри уйрăмĕ саплаштарать.

"Ĕçлекен ашшĕ-амăшĕнчен пĕри ĕçе вырнаçнипе вырнаçманнине пăхмасăр хушма кану кунĕсем илме пултарать. Ашшĕ те, амăшĕ те ĕçлеççĕ-тĕк, кану кунĕсене хăйсене кирлĕ пек пайлама пултараççĕ. Сăмахран, амăшĕ икĕ кун, ашшĕ - тепĕр иккĕ, пĕр датăсенчех, илме пултараççĕ. Анчах çакна асра тытмалла: çемьере темиçе сусăр ача пулсан та хушма кану кунĕсен шучĕ ỹсмест", - палăртать Раççей Социаллă фончĕн Чăваш Енри уйрăмĕн управляющийĕ Валерий Николаев.

Çакна шута илмелле: ашшĕ-амăшĕ тỹлевсĕр отпускра е 3 çула çитиччен ачана пăхмалли отпускра пулсан, хушма кану кунĕсем пулмаççĕ.Çавăн пекех усă курман кану кунĕсене çитес çула куçарма юрамасть, çак кунсене аванспа та памаççĕ.

Ашшĕ-амăшĕнчен (опекунсенчен, попечительсенчен) пĕри çав çул урăх ĕçе куçрĕ-тĕк, унăн малтанхи ĕç вырăнĕнчен справка илмелле. Унта çулталăк пуçланнăранпа ĕçрен кайиччен миçе хушма кану кунĕпе усă курнине палăртмалла.

Ыйтусем пур пулсан тĕплĕнрех специалистсемпе çак телефон номерĕпе: 8-800-100-00-01 çыхăнмалла.