Нỹхрепсене (путвалсене) çĕнĕ тухăçа упрамашкăн тасатса хатĕрленĕ чухне республикăра кашни çулах инкек-синкек сиксе тухать. Сăлтавĕ вара, акă, мĕнре: çулла хупă нỹхрепре наркăмăшлă газсем пухăнаççĕ, вĕсем кислорода хăваласа кăлараççĕ. Çапла майпа çын нỹхрепе ансанах, пĕрре сывласа илсенех, тăнне çухатать.

Акă, нумаях пулмасть, путвалсенче сиенлĕ наркăмăшпа анранă икĕ тĕслĕхе шута илнĕ. Пĕринче инкеке лекнисене çăлса хăварма май килнĕ, тепринче вара ватă арçын пурнăçран уйрăлса кайнă, тата 6 çын, ăна çăлма хăтланнăскерсем, шар курнă, вĕсен шутĕнче - тăванĕсемпе кỹршисем. Васкавлă медицина пулăшăвĕн бригади вĕсене больницăна токсикологи уйрăмне илсе çитернĕ.

Çавăнпа Чăваш Ен Сывлăх сыхлав министерстви нỹхрепре ĕçленĕ чухне, инкек ан пултăр тесен, хăрушсăрлăх техникине çирĕп пăхăнма ыйтать. Нỹхрепе аниччен ăна малтан уçăлтармалла. Вăхăт иртсен унта углекислă газ пуррипе-çуккине тĕрĕслемелле: çурта çутса витрене лартмалла та çиппе кăкарса нỹхрепе антармалла. Çурта сỹнчĕ-тĕк унта анма тăхтăр. Нỹхрепри ĕçсене иккĕн пурнăçламалла: пĕри сăнаса тăтăр, кирлĕ-тĕк пулăшу патăр. Аяла анаканнин хăйне вĕренпе кăкармалла, вĕçне çỹлтин тытмалла - çапла майпа инкек сиксе тухсан пулăшма çăмăлрах.

Нỹхрепе аниччен ăна лайăх пăхмалла: ишĕлсе аннă вырăнсем çук-и? Кăмăл пăтранма, пуç çаврăнма пуçласан, тăрук вăй пĕтсен часрах нỹхрепрен тухмалла тата тухтăрсене чĕнмелле. Кусем - организм наркăмăшланнин паллисем.

Тĕплĕнрех - "Пирĕн пурнăç" хаçатра.