Ялсенчи урамсенче ачасемпе çамрăксем тĕрлĕ транспорт хатĕрĕсемпе пысăк хăвăртлăхпа çỹренине курма хăнăхнă ĕнтĕ. Анчах та ку хăнăху тахçанах тарăхăва куçрĕ.

Урамсем тăрăх мототехника йышлă чупать. "Курăр, манăн кăна кун пекки!" тенĕн. Кунĕпе миçе хут хутлаççĕ-ши? Арçын ачасем кăна-и тата? Хĕрачасем те руль умне ларнине курма пулать. Шăплăха аркатса, тусан йăтса йăлăхтарса çитереççĕ. Унта та кунта электросамокатпа çил хăвалакансем те пур.

Çапла, мототехникăпа çỹрекен ачасемпе çамрăксем çул çинче чăн-чăн инкек пулса тăчĕç. Çул-йĕр правилисене уямаççĕ, хăрама пĕлмеççĕ, авари сиксе тухма пултарассине ăнланмаççĕ...

Питбайк çỹренине час-часах курма пулать. Вăл - хаклах мар пĕчĕк мотоцикл. Ăна Патшалăх автоинспекцийĕнче регистрацилес нуша çук, права та кирлĕ мар - руль умне кирек кам та ларма пултарать. Çак сăлтавсене пула питбайк ачасемпе çамрăксем хушшинче анлă сарăлнă. Анчах вăл - спорт инвентарĕ. Çакна манмалла мар: питбайкпа тренировка трассисемпе кăна çỹреме юрать, транспорт çулĕ çине тухма юрамасть. Шел те, çакна нумайăшĕ шута илмест.

Тĕплĕнрех - "Пирĕн пурнăç" хаçатра.