Чĕр тавар мар, хатĕр продукци ăсататпăр

Правительство çурчĕн Ларусен пысăк залĕнче иртнĕ Аслă экономика канашĕн анлă ларăвĕнче экономика аталанăвĕн министрĕн тивĕçĕсене вăхăтлăх пурнăçлакан Лариса Рафикова республикăн экспорт ĕç-хĕлĕн 2030 çулчченхи стратегийĕпе паллаштарнă.

Чăваш Ен Пуçлăхĕ Олег Николаев, ларăва уçнăскер, отрасль стратегине палăртнă май уйрăм çын, уйрăм территори ырлăхне тивĕçтермелли тĕллевсене çирĕплетни пысăк пĕлтерĕшли çинчен каланă. Эппин, экспорт стратегийĕ те çакна тĕпе хумалла.

2024 çул кăтартăвĕсем тăрăх Чăваш Ен экспорт калăпăшĕн ỹсĕмĕн хăвăртлăхĕпе федерацин Атăлçи округĕнче тăваттăмĕш вырăнта. Çакă пĕлтерĕшлĕ: чикĕ леш енне ăсатакан продукцин 99,9 проценчĕ - чĕр таварпа тата энергетикăпа çыхăнман таварсем. 46,4 проценчĕ - пысăк технологиллĕ продукци. Экспортăн пĕтĕмĕшле калăпăшĕнче машиностроени продукцийĕ тĕп вырăн йышăнать - 61 процент. Çав вăхăтрах АПК продукцийĕн тỹпи те хушăнса пырать - 16 процент шайне хăпарнă. Хими - 14, пулăшу ĕçĕсем - 11 процент.

Паллă сăлтавсене пула юлашки çулсенче тулашри экономика ĕç-хĕлĕн тытăмĕнче тата географийĕнче курăмлă улшăнусем пулнă. Экспортпа ĕçлекен компанисен шучĕ 610 çитнĕ. Вĕсен 95 проценчĕ - пĕчĕк тата вăтам предпринимательлĕх субъек- чĕсем. Унччен Европа, Америкăри Пĕрлешỹллĕ Штатсен еннелле туртăннă пулсан, халĕ Чăваш Ен ытларах Китайпа, Индипе, Вăтам Ази, Африка, Çывăх Хĕвел тухăç çĕршывĕсемпе ĕçлет - унти горизонтсене анлăлатма ăнтăлать.

Тĕплĕнрех - "Пирĕн пурнăç" хаçатра.