Лавккари хăш-пĕр продуктсемпе çăмăл-лăнах наркăмăшланма пулать. Тавар лайăх курăнни вăл пахалăхлă пулнине пĕлтермест. Хитре упаковкăпа аппетитлă шăршă хыçĕнче усă курмалли вăхăчĕ иртнĕ тавар пулма пултарать. Хатĕр апат-çимĕç тунă чухне те усă курмалли вăхăчĕ тухакан продуктсемпе тăтăшах усă кураççĕ. Çапла майпа вĕсене "иккĕмĕш пурнăç" параççĕ. Салатсенче, гарнирсенче, кукăльсенче ĕнерхи пахча çимĕç, аш-какай пулма пултарать.

Вĕсем лайăх курăнччăр, çынна илĕртчĕр тесе витринăри аш-какайпа пулла илемлĕ сăн кĕртеççĕ. Типсе кайнă аш-какая шывпа сирпĕтеççĕ, ырă мар шăршине лимон сĕткенĕпе пĕтереççĕ. "Ватăлса" кайнисене маринадласа çурма фабрикат пек сутаççĕ. Упаковкăсăр пулă та иккĕлентермелле - маркировкине пăхмалла. Унăн ырă мар шăршине уксуспа е лимон сĕткенĕпе пĕтереççĕ.

Экспертсем заводра туса кăларнă продуктсене туянма сĕнеççĕ - вĕсене лавккара уçмаççĕ, çĕнетмеççĕ.

Çак паллăсем çине тимлĕх уйăрмалла:

. Ытла çутă тĕс. Продукт япăх пулсан ăна сăрăсемпе "иккĕмĕш пурнăç" парнелеççĕ.

. Техĕмлĕх нумай тултарнă. Продуктăн япăх тутине "пытараççĕ".

. Майонезпа тунă кулинари салачĕсем. Вĕсем хăвăрт пăсăлаççĕ.

. Маринадланă аш-какай. Вăхăчĕ тухнă продукта чылай чухне маринадласа сутаççĕ.