Çуллахи ăшă кунсем тăраççĕ. Çак тапхăрта ачасем чỹречерен ỹкнĕ тĕслĕхсем уйрăмах тĕл пулаççĕ. Тĕрĕссипе, пур тĕслĕхсенче те пĕчĕкскерсем хăй тĕллĕн чỹрече анине хăпарса каяççĕ, москит сетки çине таянаççĕ. Вăл вара ачан йывăрăшне чăтаймасть. Ашшĕ-амăшĕн чун тĕпренчĕкĕсене пĕр çеккунтлăха та тимлĕхсĕр хăварма юраманнине асра тытмалла. Чỹречесене, форточкăсене хупă тытмалла. Вĕсем çинче ятарлă çăра пулмалла. Чỹрече çывăхĕнче тĕрлĕ сĕтел-пукан пулни те вырăнсăр. Унпа усă курса ача çăмăллăнах чỹрече анине хăпарса кайма пултарать.

Ачасен хăрушсăрлăхĕ аслисен яваплăхĕнчен чылай килет. Килте пĕчĕк ачасем пур-тăк - чỹречесене уçă хăвармалла мар. Чỹрече çывăхĕнчи кравать çинче сиксе выляни те инкек патне çитерме пултарать. Çемьере аслă ачасем пур-тăк - вĕсене кĕçĕннисене асăрхаса тăма каласах тăмалла. Ача-пăча пỹлĕмĕсене тĕрлĕ аксессуарсемпе илемлетме тăрăшатпăр. Жалюзи, рулонлă шторăсем модăна кĕрсе кайрĕç. Вĕсем çинче тĕрлĕ вăчăрасем çакăнса тăма пултараççĕ. Пĕчĕкскерсем пуринпе те интересленме пикеннине шута илмелле. Унран çакланас хăрушлăх пысăк.

 Июль уйăхĕнче кăна республикăра виçĕ ача суранланнă: талăк хушшинче икĕ шăпăрлан виççĕмĕш хутран, тепри çуртăн пусми çинчен ỹкнĕ.