Ачкасси ялĕнче пурăнакан Валентина Николаевнăпа Юрий Осиповича шăпа пĕрлештернĕренпе темиçе теçетке çул та иртрĕ. Вĕсем алла-аллăн пĕрле 55 çул утăмлаççĕ. Çак тапхăрта савăнăçне те, йывăрлăхне те курнă, икĕ ачана - ывăлпа хĕре - кун çути парнелесе ура çине тăратнă. Халĕ вĕсен виçĕ мăнукпа пилĕк кĕçĕн мăнук пур.

Вĕсен историйĕ Шупашкарти трактор саппас пайĕсен заводĕнче пуçланнă. Унта Юрий Осипович транспорт цехĕнче вăй хунă. Валентина Николаевна вара механика цехĕнче тăрăшнă. Шăпах çавăнта пĕр-пĕринпе паллашнă та вĕсем.

Çамрăксен пĕрремĕш тĕлпулăвĕ романтикăллă пулнă: вĕсем Шупашкарти залив хĕрринчи "Тăван çĕршыв" кинотеатра кино курма кайнă. Кино "Амăшĕн юратăвĕ" ятлă пулнă.

Паянхи кун Яндайкинсемшĕн чи кирли - ачасем таса-сывă пулни, мăнуксем савăнни тата кĕçĕн мăнуксем йăл кулни.

"Пурнăç юратупа тата тимлĕхпе тулнă пулсан - ватлăх тата чир-чĕр пирки шухăшлама вăхăт та çук", - тет мăшăр.

Яндайкинсен çемйи - чылайăшĕшĕн тĕслĕх! Вĕсен кашни кунĕ пĕрремĕш тĕлпулăвăн асаилĕвĕ пек хĕвеллĕ пултăр, чĕрисенче ăшă туйăмсем хуçаланччăр!