Ятарлă çар операцийĕнчен киле таврăнсан салтак пурнăçăн пач урăхла условийĕсене лекет. Лере, çапăçусем пынă вырăнта, пухнă çар опычĕ унăн тĕнчекурăмне кăна мар, тыткаларăшне те улăштарать. Вăл улшăннине епле йышăнмалла? Салтака мирлĕ пурнăçа хăнăхма епле пулăшмалла? Кун пирки медицина психологĕ Елена НИКОЛАЕВА каласа кăтартать.

- Мирлĕ пурнăçа таврăнсан боец пурнăçăн урăхла условийĕсене лекет. Тен, вăл хăйне обществăра кирлĕ мар пек туйĕ, ыттисемпе ăнланманлăх сиксе тухма пултарать. Салтак пурнăçра хăйĕн çĕнĕ вырăнне шырама тытăнĕ. Кун пек чухне çывăх çыннисемпе - мăшăрĕпе, ашшĕ-амăшĕпе, ачисемпе - мĕнле хутшăнни пысăк пĕлтерĕшлĕ. Салтаксен çар опычĕ тĕрлĕрен: пĕрисем çар машинипе çỹреççĕ, теприсем чаçсене кирлĕ хатĕрсемпе тивĕçтереççĕ, виççĕмĕшĕсем çапăçусене хутшăнса вилĕмпе куçа-куçăн тăраççĕ. Тĕрлĕ опыта тĕрлĕрен чăтса ирттереççĕ. Çакна ăнланни пĕлтерĕшлĕ: арçын ятарлă çар операцине хутшăннă тапхăрта çемьери мĕнпур çын, вĕсен хушшинчи хутшăну улшăнать. Салтак киле таврăнсан малтанхи виçĕ куна шăв-шавсăр, хăнасене чĕнмесĕр ирттерме тăрăшăр. Унăн тавралăх сассине, порохсăр шăрша, урамра лăпкă утса çỹрекен çынсене, лапамра вылякан ачасене хăнăхмалла. Ăна канма, çăвăнса тасалма, лăпкăн апатланма, çывăрса тăранма май парăр. Çĕрле çини те - йĕркеллĕ пулăм.

Тĕплĕнрех - "Пирĕн пурнăç" хаçатра.