Республикăра Чăваш Ен Пуçлăхĕ Олег Николаев пуçарнипе "Сывлăх патне утăм" проект вăй илчĕ. Унпа килĕшỹллĕн мĕнпур ял-хулара сывлăх пункчĕсем ĕçлĕç, кашниех тĕрĕслев витĕр тухса анализ пама, тухтăрпа канашлама пултарĕ. Проект Чăваш Енре пурăнакансене медицинăри хальхи йышши меслетсене туллин туйса илме, усă курма май парĕ. Меллĕ пултăр тесе эрнесерен халăх патне тухса çỹремелли график йĕркелеççĕ.

"Регионти пĕр ял та, хула та тимлĕхсĕр юлмĕ. Проекта хастар хутшăнса сывлăхпа пурăнар!" - палăртнă Республика Пуçлăхĕ Олег Николаев.

Июнĕн 25-мĕшĕнче пирĕн округра та "Сывлăх патне утăм" проект пурнăçа кĕчĕ. Тухтăрсенчен, медицина сестрисенчен тата волонтерсенчен тăракан ушкăн округра пурăнакан тĕрлĕ ỹсĕмри çынсен сывлăхне упраса хăварас тĕллевпе ĕçе пурнăçланă. Ятарлă палаткăра терапевтсемпе тĕрлĕ специалистсем - невролог, хирург, офтальмолог - ĕçленĕ. Вĕсем пациентсене тĕрĕсленĕ, консультаци панă, кирлĕ пулсан тулли тĕрĕслев ирттерме больницăна та янă.

Кунта çынсем куç ăшĕнчи пусăм виçине, артери пусăмне, çỹллĕшпе кĕлетке йывăрăшне виçме, хăйсен ỹт-пĕвĕн виçин индексне палăртма пултарнă. Медицина профилактикин кабинечĕн заведующийĕ Сывлăх шкулĕн занятийĕсене ирттернĕ. Куçса çỹрекен фельдшерпа аку-шер пунктĕнче юнăн пĕтĕмĕшле тата биохими анализĕсене пама, ВИЧ тестне тума, юнри холестеринпа сахăр шайне палăртма, çавăн пекех ЭКГ тума май килнĕ. Хĕрарăмсем валли тĕрĕслев пỹлĕмĕ те ĕçленĕ. Мероприятие йĕркелеме волонтерсем те хастар пулăшнă.