Майăн 31-мĕшĕнче Тăвай муниципаллă округĕнче ял çамрăкĕсене пĕрлештерекен пысăк агропромышленность пуçарăвĕ - "Салара чи лайăххисем" тăваттăмĕш Агрослет - иртнĕ. Йăлана кĕнĕ тăрăх, вăл хăнасене "Медвежий угол" кану базинче пухнă. Мероприятие 1,6 пин ытла çын хутшăннă, хăйсен пултарулăхĕпе паллаштарнă.

Округран слета 60 яхăн çын хутшăннă, сала йăли-йĕркине сăнласа, ялти пурнăçа интереслĕрех тума тăрăшнине кăтартса панă. Çамрăк пулни, ĕçе парăнни, тăван тăрăха юратни, çутçанталăк пуянлăхне упрани - çаксем пурте салара чи лайăххисем çинчен! Шăпах кун пек çынсене пула пирĕн çĕршыв вăйлăрах тата çирĕпрех пулать. Тăван çĕр çинче тăрăшни çеç пур нацие те вăй-халпа пуянлатать. Агрослета пухăннисем те пирĕн çĕршыва хăватлăрах, телейлĕрех тăваççĕ. Кăçал мероприяти анлăрах иртнĕ. Чăваш Енри представительсемсĕр пуçне Атăлçи федераци округĕнчен 14 команда хутшăнма кăмăл тунă. Пухăннисене "Çĕнтерĕве пĕрле кĕтĕпĕр!" лозунг пĕрлештернĕ. Ăна Аслă Отечественнăй вăрçăра çĕнтернĕренпе 80 çул çитнине халалланă. Вăл ăрусен пĕрлĕхне, тĕнчене юратнине тата пирĕн халăхăн патриотлăхне çирĕплетет.

Тĕплĕнрех - "Пирĕн пурнăç" хаçатра.