Май уйăхĕнче ĕçленĕшĕн панă аванса илсен нумайăшĕн, ахăртнех, кăмăл пăсăлчĕ. Мĕншĕн вăл ытти чухнехинчен пĕчĕкрех?

Çав вăхăтрах ку пулăмăн лайăх енĕ те пур: ĕç укçин юлнă пайĕ, июнь уйăхĕнче параканни, пысăкрах пулĕ. Мĕншĕн? Шут ĕçченĕсене тĕплĕнрех ăнлантарма сĕнтĕмĕр.

"Чи малтанах уçăмлатар-ха: шалу мĕнрен пуçтарăнать? - терĕ Вера Ананьева бухгалтер. - Саккунпа килĕшỹллĕн, вăл икĕ пайран тăрать. Уйăхăн пĕрремĕш пайĕнче - 1-15-мĕшĕсенче - ĕçленĕшĕн уйăх вĕçĕнче параканни аванс шутланать. Иккĕмĕш пайне тепĕр уйăх пуçламăшĕнче тỹлеççĕ. Юлашки çулсенче хушма тỹлевсĕр тата премисĕр оклад чухлĕ шалу илекенсен çак "пайсен" виçи пĕрешкел. Çакăн сăлтавĕ - 2023 çулхи улшăнусем. Икĕ çул каялла тупăш налукне авансран та, шалуран та тытма пуçланă. Маларахри çулсенче - уйăхра пĕрре. Çавăнпа ĕç укçин пĕр пайĕ тепринчен пĕчĕкрех пулнă".

Кăçалхи май уйăхĕнчи аванс пĕчĕкрех пулни вăрăма кайнă кану кунĕсемпе - 1-4-мĕшĕсем тата 8-11-мĕшĕсем - çыхăннă. Унччен предприяти ертỹçи аванс виçине, тĕслĕхрен, 20-30 процент шайĕнче çирĕплетме пултарнă. Хальхи вăхăтра вара аванса ĕçленĕ кунсене тĕпе хурса шутлаççĕ. Сăмахран, çын уйăхăн пĕрремĕш пайĕнче "больничный" е кану кунĕсем илнĕ-тĕк - аванс пĕчĕкрех пулать. Уяв кунĕсем лексен те çавăн пекех пулса тухать. Кăçалхи май уйăхĕн пĕрремĕш çурринче 7 кун кăна ĕçленĕ. Çавна май аванс виçине пĕчĕкрех шутласа панă. "Анчах та çакă уйăх шалăвĕ пĕчĕкрех пулассине пĕлтермест, - терĕ Вера Ананьева. - Ĕç кунĕсем сахалрах пулин те пĕтĕмĕшле тỹлев виçи улшăнмасть".

Сăмах май, ку калаçу пилĕк кунлă ĕç эрнипе тата икĕ кану кунĕпе вăй хуракансене пырса тивет. Экспертсем палăртнă тăрăх, икĕ кун канса иккĕ ĕçлекенсем май уйăхĕнче пысăкрах шалу илме пултараççĕ, мĕншĕн тесен кун пек йĕркепе тăрăшакансен ĕç кунĕсем уяв кунĕсене лекеççех. Саккунпа килĕшỹллĕн, уявра ĕçленĕшĕн икĕ хут пысăкрах виçепе тỹлемелле. Кун пек чухне специалист мĕнле кун йĕркипе вăй хуни пĕлтерĕшлĕ мар.

Валентина БАГАДЕРОВА