Майăн 21-мĕшĕнче муниципаллă округра, пĕтĕм республикăри пекех, Пĕрлехи информаци кунĕ иртрĕ. Хальхинче информаци ушкăнĕ округ пуçлăхĕ Иван Михопаров ертсе пынипе Хĕрлĕ Чутай шкулĕнче пулчĕ, вĕренекенсемпе, вĕсен ашшĕ-амăшĕпе тата вĕрентекенсемпе тĕл пулчĕ.

Тĕлпулура виçĕ тĕп ыйтăва пăхса тухрĕç: "Вĕрентỹ - пурнăçри ăнăçу уççи. Вĕрентỹ отраслĕн 2024-2025 çулсенчи ĕç пĕтĕмлетĕвĕсем. Вузсене тата техникумсене вĕренме кĕмелли кампани", "Ачаллă çемьесене пулăшмалли регионти мерăсем", "Чăваш Республикинче "Пушкин картти" федераллă проекта пурнăçа кĕртни".

Мероприяти савăнăçлă лару-тăруран пуçланчĕ, вĕренỹре тата ĕçре палăрнă вĕренекенсемпе педагогсене чысларĕç. Вĕсен çитĕнĕвĕсене муниципаллă округ пуçлăхĕ Иван Михопаров тата Чăваш Республикин Патшалăх Канашĕн депутачĕ Николай Малов палăртрĕç.

Николай Нагоров (Хусанушкăнь шкулĕ, 9-мĕш класс), Анна Вазикова (Хĕрлĕ Чутай шкулĕ, 10 А класс), Анна Сятрайкина (Хĕрлĕ Чутай шкулĕ, 11 А класс), Нелли Чубайкина (Хĕрлĕ Чутай шкулĕ, 9 Б класс,) Полина Никифорова (Атнар шкулĕ, 11-мĕш класс), Снежана Мареева (Питĕркасси шкулĕ, 8-мĕш класс), Анна Ятманова (Мăн Этмен шкулĕ, 11-мĕш класс), Ульяна Макарова (Мишеркасси шкулĕ, 9-мĕш класс), Екатерина Катушкина (Шулю шкулĕ, 6-мĕш класс), Дмитрий Лукин (Çĕн Атикасси шкулĕ, 11-мĕш класс) вĕренỹри çитĕнĕвĕсемшĕн Чăваш Республикин Патшалăх Канашĕн депутачĕн Николай Маловăн ятран паракан стипендине тивĕçнине çирĕплетекен сертификатлă пулчĕç.

 Тĕплĕнрех - "Пирĕн пурнăç" хаçатра.