Май уявĕсем те хыçа юлчĕç. Чи пĕлтерĕшли Çĕнтерỹ кунĕ пулчĕ. Çак кун çĕнтерỹçĕсене асра тытса "Вилĕмсĕр полка" хутшăнтăмăр. Çывăх кунсенчех Раççейри чикĕ сыхлакансемпе пĕрле Совет çĕршывĕ пулнă вăхăтра çарта тăнă пулас ветерансемпе пĕрле Пограничник кунне паллă тума пуçтарăнăпăр.

Кашни çулах майăн 28-мĕшĕнче пограничниксем хăйсем палăртнă вырăнсенче пухăнаççĕ, калаçу тĕпелĕсем, асаилỹ каçĕсем ирттереççĕ. Отрядсенче е заставăсенче тĕрлĕ вăхăтра службăра тăнă салтаксен аса илмелли нумай. Эпĕ пĕлессе, Хĕрлĕ Чутайри Çĕнтерỹ лапамĕнче те ентешсем асăннă уява аван ирттереççĕ. Кăçал та çак йăла-йĕрке улшăнмаççех. Çамрăк чухне, унтан маларах та, салтака каякан каччăсем урам тăрăх хĕрсенчен илнĕ тутăрсене сулласа, хулпуççи урлă тĕрленĕ алшăлли çакса тус-юлташĕсемпе юрă шăрантаратчĕç. Хальхи вăхăтра çак ĕлĕкхи йăла хăш-пĕр вырăнсенче кăна сыхланса юлнă пулĕ.

Тĕрĕссипе каласан, çỹлерех асăннă йăлана хамăр та ирттернĕ. 1969 çулхи май уйăхĕн 24-мĕшĕнче салтака каяс умĕн Слава Храмов çывăх тусăмпа Мишеркасси ялĕнче, хамăр Шупашкарта пурăннă пулин те, халăха пуçтарса ăсату каçĕ ирттертĕмĕр. Çак кун эпĕ те салтак тумне тăхăнтăм. Манăн тусăм Слава сержантсен шкулне пĕтерчĕ, хăйĕн службине Шупашкарта тăсрĕ.

Тĕплĕнрех - "Пирĕн пурнăç" хаçатра.