Тăван çĕршывăн Аслă вăрçи чарăннăранпа кăçал 80 çул çитрĕ. Çĕнтерỹ кунĕ - кашниншĕн чи аслă уяв. Хуть те миçе çул иртсен те эпир нихăçан та çак вăрçă чи хăрушши тата тискерри пулнине манмăпăр. Çĕнтерỹ кунĕ çĕршывăмăрăн ирĕклĕхĕпе чысне упрамаллине, ăна юратмаллине тата сыхламаллине тепĕр хут аса илтерет.

Кашни çемьере вăрçă хăйĕн хура йĕрне хăварнă. Районтан 8020 çын вăрçа тухса кайнă. Анчах та вĕсенчен 4306 ентешĕмĕр вăрçă хирĕнче ĕмĕрлĕхех куçĕсене хупнă. Паянхи куна районта пĕр вăрçă участникĕ çеç пурăнать. Ăна Клавдия Гавриловна Ижетникова тесе чĕнеççĕ, вăл Çĕн Атикасси ялĕнче пурăнать.

Пирĕн шкулта таврапĕлỹ музейĕ пур. Алăкран кĕрсенех Тăван çĕршывăн Аслă вăрçине хутшăннă паттăрсен сарăхса кайнă сăнỹкерчĕкĕсем курăнса тăраççĕ. Стенд патĕнче хаяр тăшманпа кĕрешме хавхалантаракан çырусем, тылран килнисем упранаççĕ унта. Çак самантра çĕнтерỹçĕ салтаксем мана куçран ăшшăн та тинкерсе: "Пирĕн çинчен манса каяс çук сирĕн, мăнукăм..." - тенĕ евĕрех туйăнчĕ. Чунра ăшă, ырă пулса кайрĕ. Хама пархатарлă та çирĕп тымарлă йывăçăн çĕнĕ хунавĕ пек туйрăм. Паттăр салтаксем илтеççĕ пулсан эпĕ çирĕппĕнех çапла хуравланă пулăттăм: "Манас марччĕ сире нихăçан та. Йăхусем сирĕн пилĕк сыпăка çитрĕç". Унта хамăр тăрăхри фронтовик - учительсен кĕтесĕ те пур. Мана уйрăмах Петр Порфирьевич Пигильдин паттăрлăхĕ тĕлĕнтерчĕ те савăнтарчĕ.