Вăрçă вăл - хăрушă та хаяр вăхăт, ун чухне çынсем чи йывăр тĕрĕслевсене тỹссе ирттернĕ, вĕсен хĕрхенỹсĕр тăшмана хи-рĕç кĕрешме пĕтĕм вăй-халне тăкма тивнĕ. Кашни ăру хăйĕн вăрçине курать. Паян Раççей халăхĕ çĕнĕ хăрушлăхпа кĕрешет, хăйĕн çĕрне, ирĕклĕхне, хаклăхĕсене хỹтĕлет.

Тăван çĕршывăн Аслă вăрçи - пирĕн историн хăрушă та паттăрла страници. Арçынсемпе танах хаяр тăшмана тĕп тума хĕрарăмсем те алла пăшал тытса кар тăнă. Паян манăн Тăван çĕршывăн Аслă вăрçин ветеранĕ, Утаркасси ялĕнче пурăннă Вера Михайловна Петрова (Герасимова) çинчен каласа парас килет.

Вера Михайловна Петрова 1922 çулхи апрель уйăхĕн 18-мĕшĕнче Пантьăк ялĕнче хресчен çемйинче çуралнă, пĕтĕм ачалăхне çĕршĕн, çемьешĕн тăрăшса ирттернĕ. Хватукассинчи çичĕ çул вĕренмелли шкултан, 1940 çулта Етĕрнери педагогика училищинчен вĕренсе тухнă. Училищĕре вĕренме пуçланă пĕрремĕш кунранах вăл вĕрентесси унăн ĕçĕ пулассине ăнланса илнĕ. Ку професси кăна мар, ачаранах ăнтăлнă чĕре чĕнĕвĕ пулнă. Вера Михайловна ачасене юратнă, хăйĕн пĕлĕвĕпе ăсталăхне вĕсене пама ĕмĕтленнĕ.

Вĕренсе тухсан ăна Хĕрлĕ Чутайри сакăр çул вĕренмелли шкулта уроксем ирттерме шаннă. Вĕрентес ĕçре унăн меслечĕ хăйне евĕрлĕ пулнă - вăл занятисене интереслĕ те илĕртỹллĕ тума ăнтăлнă. Класра яланах туслăхпа хисеплĕх хуçаланнă. Унăн вĕренекенĕсем уроксене хаваспах пынă, мĕншĕн тесен кашни кун кăсăклă иртнĕ. Кунта вăл икĕ çул ĕçленĕ.