Хĕрлĕ Чутайра пурăнакан Наумовсен нумай ачаллă çемйи кил-çурт сертификатне тивĕçнĕ. Вĕсем унпа усă курса пурăнмалли çурт-йĕр туянма е çурт çĕклеме пултарĕç. Асăннă документа савăнăçлă лару-тăрура çемьене муниципаллă округ пуçлăхĕ Иван Михопаров панă. Вăл Наумовсене чĕререн саламланă, пулăшупа усă курса çĕнĕ çурт туянма суннă.

Кил-çурт вучахне упракан Марина Николаевна Хĕрлĕ Чутай шкулĕнче хуçалăх заведующийĕнче тăрăшать, çемье пуçĕ Александр Ильич предпринимательлĕх ĕçĕпе вăй хурать.

Мăшăр пилĕк ачана воспитани парать. Аслисем, Даниилпа Ульяна, - вĕренỹ заведенийĕн студенчĕсем, Злата хĕрĕ шкулта вĕренет, кĕçĕннисем, Степанпа Егор - ача садне çỹреççĕ.

"Пирĕн аслă ачасем Шупашкарта професси пĕлĕвĕ илеççĕ, çавăнпа та эпир шăпах тĕп хуламăрта хваттер туянма йышăнтăмăр. Вĕсен пурăнма меллĕ вырăн пултăр", - палăртать мăшăр. Çак курăмлă патшалăх пулăшăвĕшĕн вĕсем Чăваш Республикин Правительствине тата регион ертỹçине Олег Николаева тав сăмахĕ калаççĕ.