Çĕнтерỹ кунĕ тĕлне Совет Союзĕн Геройĕ Алексей Логинов пурăннă кил-çурчĕ çине савăнăçлă лару-тăрура çĕнетнĕ мемориал хăми вырнаçтарнă.

Муниципаллă округ Совет Союзĕн Геройĕн ятне тивĕçнĕ паллă икĕ ентеше асрах тытать. Вĕсем - Ачкассинчи Иван Васильевич Индряков тата Упукушкăнчи Алексей Романович Логинов. Çĕнетнĕ хăма шучĕпе пирĕн паттăрсен иккĕмĕш астăвăм палли пулать.

Алексей Романович Логинов 1903 çулхи мартăн 11-мĕшĕнче Упукушкăнче çуралнă. Вăрçă пуçланиччен милиционерта вăй хунă, каярахпа халăх судйинче службăра тăнă. Анчах та 1941 çул унăн шăпине тĕпрен улăштарнă: Хĕрлĕ çар ретне тăрса офицерсен курсне тухнă, çĕршывăн чăн-чăн хỹтĕлевçи пулма хатĕрленнĕ. Алексей Романович Брянск тата Тĕп фрончĕсенче иртнĕ хаяр çапăçусене хутшăнса хастарлăх кăтартнă, Çĕнтерĕве çывхартассишĕн вăй-халне шеллемен. Шел те, 1943 çулхи сентябрĕн 28-мĕшĕнче Днепр патĕнче иртнĕ операцире ăна вилмеллех амантнă.

Унăн ячĕпе тăван ялăн пĕр урамне панă. 2019 çулхи майăн 8-мĕшĕнче Шупашкарта Алексей Романович Логинова халалласа Шалти ĕçсен министерствин çурчĕ çывăхĕнче палăк уçнă. Палăк вырнаçнă урам та ун ятне илнĕ. Унта хĕрлĕчутайсен "Чавал" ентешлĕх канашĕн пайташĕсем çулсерен ентеше пуç тайса чечексем хураççĕ.

Совет Союзĕн Геройĕн ывăлĕ Михаил та 17 çултах, 1942 çулта, ашшĕ пекех, Тăван çĕршыва хỹтĕлеме кайнă, тинĕс пехотинецĕ пулнă. Шел те, вăл 1945 çулхи февралĕн 1-мĕшĕнче çар заданине пурнăçланă чухне паттăррăн вилнĕ.

Совет Союзĕн Геройĕн Алексей Романович Логиновăн ячĕ нихăçан та манăçмĕ. Вăл историе яланлăхах çырăнса юлнă.