Çак кунсенче регион Пуçлăхĕ Олег Николаев Чăваш Енри салтаксен çемйисен комитечĕн ертỹçипе Ольга Владимировапа тĕл пулнă. Тĕлпулу вăхăтĕнче комитетăн 2024 çулхи ĕçне пĕтĕмлетнĕ тата ĕç-хĕлĕн приоритетлă çул-йĕрĕсене палăртнă.

Олег НИКОЛАЕВ, Чăваш Ен Пуçлăхĕ:

- Чăваш Енри салтаксен çемйисен комитечĕн ертỹçипе Ольга Владимировапа ĕçлĕ тĕлпулура пĕлтерĕшлĕ темăна - хамăр çар çыннисене тата вĕсен çемйисене пулăшассине - сỹтсе яврăмăр. Комитет ĕçĕ тыткăнлать. Ольга Николаевна - хăй те çар çыннин мăшăрĕ тата икĕ ача амăшĕ. Хăйĕн командипе пĕрле вăл калама çук пысăк ĕç пурнăçлать: юридици тата психологи тĕлĕшĕнчен пулăшу парасси, гуманитари пулăшăвĕ пухасси, пы-сăк пĕлтерĕшлĕ ытти проектсене пурнăçа кĕртесси...

Уйрăмах "Çĕнтерỹ кителĕ" проекта палăртса хăварас килет. Вăл мана хăйĕн шухăшĕпе - Çĕнтерỹçĕсен еткерçисен сăнỹкерттерсе Тăван çĕршывăн Аслă вăрçин ветеранĕсем пирки астăвăма упраса хăварассипе - тарăн хускатрĕ. Ку ăрусем хушшинчи çыхăнăва упрама пĕлтерĕшлĕ.

Комитет аманнă салтаксем валли "Пулăшу рюкзакĕ" проекта та пурнăçлать, çак тĕллевпе реабилитаци хатĕрĕсемпе фонд йĕркеленĕ.

Комитет "Тăван çĕршыв хỹтĕлевçисен" фончĕпе, Чăваш Енри хĕрарăмсен союзĕпе тата ытти организаципе хутшăнса нумай ĕç тунине эпир куратпăр. Шăпах çакăн пек пĕрлехи вăй-хал, тĕллевлĕ пулăшу тата килĕштерсе ĕçлеме çĕнĕ майсем шырани халĕ кирлĕ. Хастар ĕçленĕшĕн Ольга Николаевнана тата комитета тав сăмахĕ калатăп. Ку - ырă ĕç, эпир çак пысăк пĕлтерĕшлĕ пуçарусене пулăшма яланах хатĕр.