Эх, савăнăçлă иртрĕ-çке çуркуннен пĕрремĕш кунĕнче Çăварни уявĕ! Çанталăкĕ те хĕвеллĕ тăчĕ. Вăл çуркунне çитнине систерчĕ. Хĕрлĕ Чутай салин Çĕнтерỹ лапамĕнче шашлăк тата икĕрчĕ шăрши сарăлчĕ. Çуркуннене кĕтсе илме уява чылайăшĕ çемйисемпе, ачи-пăчипе тата юлташĕсемпе тухрĕ.

Округ администрацийĕн пуçлăхĕн çумĕ - вĕрентỹ пайĕн начальникĕ Игорь Живоев тата депутатсен Пухăвĕн председателĕ Николай Артемьев пухăннисене Çăварни уявĕпе саламларĕç. Вĕсен сăмахĕсенче чунтан калани тата ăшăлăх илтĕнчĕ, мĕншĕн тесен çак уяв тĕрлĕ ỹсĕмрисене тата ăрусене пĕрлештерет. Хĕрлĕ Чутайри Турă Хĕресне Çĕкленĕ храмăн настоятелĕ Максим атте те сăмах илчĕ, пухăннисене çирĕп сывлăх тата тăнăçлăх сунчĕ.

Унтан уяв театрализациленĕ представленипе, çутă та савăнăçлă концертпа тăсăлчĕ, тĕрлĕ кĕвĕ-юрă янăрарĕ, территори пайĕсен ташă ушкăнĕсем хусканăвĕсемпе тĕлĕнтерчĕç. Курма килнĕ халăх вĕсемпе пĕрле ташларĕ, юрларĕ, савăнчĕ.

Пухăннисем çунашкасемпе ватрушкăсем çинче те ярăнчĕç, хастаррисем спорт ăмăртăвĕсене хутшăнчĕç...

Тĕплĕнрех "Пирĕн пурнăç" хаçатра вуласа пĕлĕр.

Уяври ытларах сăнỹкерчĕкпе тата видеопа "Пирĕн пурнăç" хаçатăн "ВКонтакте" социаллă сетьри "Красночетайская газета "Пирĕн пурнăç" ушкăнĕнче тата "Газета "Пирĕн пурнăç" телеграм-каналĕнче паллашма пултаратăр.