Тăван çĕршывăн Аслă вăрçинче паттăрлăх кăтартнă салтаксене халăх нихăçан та манăçа кăлармĕ. Мĕн кăна курман, тỹсмен...

 Çĕнтерỹ!.. Çăмăллăн килмен вăл. Çапăçусенче пĕр кун та юн юхмасăр иртмен, çухатусăр пулман. Нумайăшĕ вăрçăран таврăнайман. Хамăрăн çывăх çынсене, тăвансене, кỹршĕсене, ялти ытти ентешсене аса илмесĕр май çук. Аслă Отечественнăй вăрçăн хаяр çапăçăвĕсем пынă çĕрте кирек ăçта та - Мускавпа Ленинград, Сталинградпа Курск, Кенигсбергпа Будапешт, Варшавăпа Берлин патĕнче, Днепрпа Одер çинче - Раççей салтакĕсемпе пĕрле пирĕн ентешсем те пулнă. Вĕсем пурте орденсемпе медальсене тивĕçнĕ. Иван Васильевич Индряковпа Алексей Романович Логинова вара Совет Союзĕн Геройĕ ят панă.

Тăван çĕршыва хỹтĕлесе хăварас шухăшпа районтан 8040 çын фронта тухса кайнă. Вăрçă кашни çемьене пырса тивнĕ. Тăшмана çапса аркатнă çĕрте паттăрсен вилĕмĕпе вара 4036 çын пуçĕсене хунă, тăван ялĕсене таврăнайман. Енкĕлт ялĕнчи пĕр ашшĕнчен çуралнă Андреевсем, сакăр ывăл-пĕртăван, вăрçа тухса кайнă, улттăшĕ - Антон, Семен, Василий, Константин, Степан, Алексей - çапăçусенче Тăван çĕршыва хỹтĕлесе пуçĕсене хунă. Хăш-пĕр çемьесенчен икшер, виçшер ывăл е пĕр ялти пысăк йăхсенчен вуншар ытла тăванĕ Çĕнтерỹ кунне кĕтсе илеймен. Ку статьяна хатĕрленĕ май эпĕ районти ялсенчи хурăнташ-тăван-пĕтенĕсем çапăçу хирĕнче паттăрсен вилĕмĕпе пуçĕсене хунисене хушаматсемпе илсе кăтартма шутларăм. Паллах, кунта çакна та палăртмалла: пурин çинчен те çырма май çук. Вĕсен ячĕсем историре ылтăн саспаллипе çырăннă, халăх асĕнчен нихăçан та манăçа тухмĕç.

Тĕплĕнрех "Пирĕн пурнăç" хаçатра вуласа пĕлĕр.

Валерий РОМАНОВ,хисеплĕ таврапĕлỹçĕ