Чечек ỹстерме юратакансемшĕн февраль - чи яваплă тапхăр, мĕншĕн тесен çак уйăхра чечек вăррисене калчалăх акма пуçламалла: пĕр çул ỹсекен георгинсене, сальвисене, пеларгонисене, гвоздикăсене... Чỹрече ани вара кунран-кун тĕрлĕ куршаксемпе, контейнерсемпе, ешчĕксемпе тулса пынине курма питĕ кăмăллă. Тинех эпир акма, ỹстерме, шăтса тухакан кашни калчана, кашни çулçăна курса савăнма пултаратпăр.

Чечек акмалли çĕр çăмăл, кăпка, нейтраллă реакциллĕ пултăр. Вăрăсене акиччен талăк хушши ислетмелле, çакăн хыççăн акма та юрать. Вĕтĕ вăрăсене çĕр çине сапаççĕ те кăштах пусăрăнтараççĕ, вăтамрах вăрăсене йăранласа акаççĕ, шултрисене пĕр-пĕрин хушшине 2-2,5 см хăварса акаççĕ те çиелтен 1,5-2 см хулăнăш çĕрпе витеççĕ. Ешчĕксене çиелтен пленкăпа е кантăкпа витсе хураççĕ.

Пĕрремĕш калчасем сăмсисене кăларма пуçласанах контейнерсене çутă вырăна куçарса лартаççĕ, анчах та хĕвел пайăркисем тỹрремĕн ỹкекен, çил витĕр çỹрекен вырăнсене мар. Калча ỹстернĕ чух çутă пысăк пĕлтерĕшлĕ, çавăнпа февральте çутă сахалрах пулнипе (ỹсен-тăран çийĕн 20 см çỹллĕшĕнче) лампа çутса памалла. Çутă парасси, шăварса, апатлантарса тăрасси - калча ỹстернĕ чух тĕп ĕçсем шутланаççĕ.

Тĕплĕнрех "Пирĕн пурнăç" хаçатра вуласа пĕлĕр.