Хĕрлĕчутайсен "Чавал" ентешлĕхĕн канашĕ муниципаллă округ администрацийĕпе пĕрле Раççей Федерацийĕн Тăван çĕршыв хỹтĕлевçин çулталăкне, Чăваш Республикин Çĕнтерỹ тата патриотизм çулталăкне халалланă сочиненисен конкурсне ирттерет.

Кăçал 5-9-мĕш классенче вĕренекенсем хăйсен ĕçĕсене Аслă Çĕнтерỹпе çыхăнтарса "Никам та манман, нимĕн те манăçман" темăпа çырĕç, 10-11-мĕш классенче ăс пухакансем "Ман ентешсем - ятарлă çар операцийĕн паттăрĕсем" темăна çутатĕç. Хальхинче сочиненисене чăвашла е вырăсла çырма ирĕк патăмăр.

Конкурс ирттермелли йĕркепе килĕшỹллĕн, шкулсенче çырнă сочиненисене тишкерсе пысăк балл пухнă икшер ĕçе муниципаллă округри вĕрентỹ пайне мартăн 21-мĕшĕ тĕлне çитермелле. Кунта вара уйăх вĕçлениччен кашни темăпа çырнă сочиненисене тишкерĕç, чи лайăххисене суйлĕç. Апрель пуçламăшĕнче ятарлă комисси çĕнтерỹçĕсене палăртĕ. Кăçал та 12 çĕнтерỹçĕ пулĕ - кашни темăпах 1-мĕш вырăн пĕрре, 2-мĕш вырăн иккĕ, 3-мĕш вырăн виççĕ.

Ентешлĕх канашĕ сочиненисен конкурсĕнче мала тухнисене дипломсемпе парнесем парса хавхалантарнисĕр пуçне вĕсене кăçал та Шупашкара экскурсие илсе килме палăртать.

Владимир САВИНКИН, хĕрлĕчутайсен "Чавал" ентешлĕх канашĕн председателĕ