Çак сăмахсемпе хăйĕн пурнăç çулне хаклать Светлана Вячеславовна ЯРУТКИНА (Светлана САЛАМ). Нумаях пулмасть вăл хăйĕн 70 çулхи юбилейне паллă турĕ.

Светлана Салам 1955 çулхи январь уйăхĕн 2-мĕшĕнче Тури Çĕрпỹкасси ялĕнче учитель çемйинче çуралнă. Тăван ялти сакăр çул вĕренмелли, унтан Хусанушкăнчи вăтам шкулсенчен вĕренсе тухнă. Хусанушкăнь шкулĕнче 1972 çултанпа малтанах аслă пио-нервожатăйра ĕçленĕ, унтан чăваш чĕлхи-пе литературине вĕрентнĕ, çав вăхăтрах музыка урокĕсене те ертсе пынă. Светлана Яруткинан педагогикăри пĕтĕмĕшле стажĕ _ 49 çул. Ĕçленĕ хушăрах вăл И.Н.Ульянов ячĕллĕ чăваш патшалăх университечĕн историпе филологи факультетĕнче аслă пĕлỹ илнĕ.

Унăн ашшĕ Вячеслав Дмитриев - вăрçă ветеранĕ. Вăл Курск-Орел ункинчи çапăçусене, Беларуçпе Польшăна ирĕке кăларнă çĕре хутшăннă, Берлина çитнĕ, тăван ялне 1945 çулхи декабрь уйăхĕнче Германи çа- рĕнчи госпитальтен таврăннă, чылай награда илме тивĕçлĕ пулнă. Вăрçă хыççăн ашшĕ 45 çул хушши шкулта ĕçленĕ, Тури Çĕрпỹкассинчи çичĕ çул вĕренмелли шкул директорĕнче, унтан директор çумĕнче тăрăшнă. Светланăн амăшĕ - тыл ĕçченĕ, вырăнти колхозра хастар ĕçленĕ.

Вячеслав Дмитриевич купăс калама пĕлнĕ, хĕрĕ те 4-мĕш класра вĕреннĕ чухне пĕрремĕш хутчен алла купăс тытса пăхнă, выляма вĕреннĕ. Аслă пионервожатăйра ĕçлеме пуçласан малтанхи ĕç укçипе баян туяннă, хăй тĕллĕнех калама вĕреннĕ. Шкул ачисене юрлама вĕрентнисĕр пуçне Светлана Яруткина вырăнти Культура çуртĕнче иртекен концертсене хатĕрленме, ялти артистсене хăй пултарнă таран пулăшма тăрăшать, халăх йăли-йĕркине, юрри-ташшине упрама, ăна аталантарса пыма вĕрентет. Вăл халĕ те алăран баян ямасть...

Тĕплĕнрех "Пирĕн пурнăç" хаçатра вуласа пĕлме пултаратăр.

Галина ЗОТОВА, Штанаш ялĕ