Хĕрлĕ Чутайри вăтам шкулта пуçаруллă бюджет программипе усă курса хальхи вăхăтри психолог (релаксаци) кабинетне тăвасшăн.

Шкулта 610 ача вĕренет, унта 70 çын ĕçлет. Шкул регионти аслă шкулсемпе тата колледжсемпе çыхăну тытать. Унсăр пуçне хушма пĕлỹ паракан ача-пăча учрежденийĕсемпе, сăмахран, "Хастар" спорт шкулĕпе, Ачасен пултарулăх çурчĕпе тата Ачасен искусство шкулĕпе хутшăнса ĕçлет. Çакă ачасен ỹнерпе спортри пултарулăхне уçса пама пулăшать.

Хальхи вăхăтри психолог кабинечĕ вĕрентỹ процесĕн пĕлтерĕшлĕ элеменчĕ пулса тăрĕ, канмалли вырăн пулĕ. Ку пỹлĕм уйрăм консультаци пама кăна мар, стресран хăтăлма тата кăмăл-туйăма сирме пулăшакан атмосфера йĕркелеме пулăшĕ.

Вĕренỹ процесне путнă шкул ачисем час-часах тĕрлĕ кăмăл-туйăмпа тĕл пулаççĕ. Психолог кабинетĕнче çемçе сĕтел-пукан, лăплантаракан юрă-кĕвĕ тата çутçанталăк элеменчĕсене вырнаçтарма пăхса хунă, вĕсем ачасене вĕренỹри хумханусенчен вăхăтлăха хăтăлма май парĕç. Кунта арт-терапи тата сывлав практики енĕпе занятисем ирттерĕç, вĕсем ачасене кăмăл-туйăмне тата хăйсене тытма пĕлме вĕрентĕç.

Шкулти психолог ĕçĕ вĕренекенсене хăйсен хумханăвĕпе пăшăрханăвĕ пирки уççăн каласа пама май паракан лайăх психологи климачĕ туса хурас тĕллевлĕ. Çакăн пек ĕçлесе ачасен кăмăл-туйăм сывлăхне çирĕплетни класра лайăх хутшăнусем йĕркелеме тата пĕтĕмĕшле вĕренỹ кăтартăвĕсене ỹстерме пулăшать.

Çапла майпа психолог (релаксаци) кабинечĕ пĕлтерĕшлĕ тĕрев центрĕ пулса тăрĕ, унта кашниех ăнланупа пулăшу тупма пултарĕ. Çакă вара Хĕрлĕ Чутай шкулĕнче сывлăхлăрах та ăнăçлăрах вĕрентỹ лару-тăрăвне йĕркелеме пулăшĕ.

Смета тăрăх, çак пысăк пĕлтерĕшлĕ проекта пурнăçа кĕртме 528 пин те 517 тенкĕ те 58 пус кирлĕ. Эпир çак проект пурнăçланасса шанатпăр. Вăл вĕрентỹ процесне хутшăнакансемшĕн усăллă пулĕ.

Наталья МИДАКОВА