Çулталăк пуçланнăранпа, пилĕк уйăхра, республикăра цифра технологийĕсемпе усă курса çынсен укçине вăрланă 1754 тĕслĕхе шута илнĕ - пĕлтĕрхи çак тапхăртинчен 27 процента яхăн нумайрах. Ыйту çивĕчлĕхне кура ăна республика Пуçлăхĕ çумĕнчи право йĕркине тивĕçтерес енĕпе ĕçлекен координаци канашĕн ларăвĕнче тишкернĕ.

ШĔМ-ĕн полици пуçлăхĕн йĕркелĕхе сыхлас енĕпе ĕçлекен çумĕ Юрий Митрофанов палăртнă тăрăх, граждансене асăннă йышши майсемпе улталаса январь-май уйăхĕсенче вĕсен 334 миллион тенкине вăрланă. Ку виçе, пĕлтĕрхи пилĕк уйăхрипе танлаштарсан, пушшех нумай ỹснĕ - 40 процента яхăн хушăннă. Çак ретри преступленисен шучĕпе эпир Раççейри тата Атăлçи округĕнчи вăтам кăтартусенчен те ирттеретпĕр иккен.

Уйрăмах анлă сарăлнă тĕслĕхсем - çынсене банк ĕçченĕсем пек пулса телефонпа шăнкăравлани. Такамсем сирĕн счет çинчи укçана вăрласшăн, сыхланмашкăн укçана урăх счет çине куçармалла тесе сĕнеççĕ те - çынсем вĕсене ĕненеççĕ... Çавăн пекех суйса тĕрлĕ пулăшу ĕçĕ, инвестици хывса пысăк услам тума сĕнеççĕ - ултав арсеналĕ пысăк. Ватăсене те, çамрăксене те улталаççĕ - ку мана пырса тивмест тесе никам та калаймĕ. 25 çулчченхи тата 60 çултан аслăрах граждансем улталаннă тĕслĕхсем кăçал икĕ хут нумайланнă.